දැනට පවතින ත්‍රස්‌තවාදය වැළැක්‌වීමේ පනත වෙනුවට නව ත්‍රස්‌තවාදී ප්‍රතිරෝධන පනතක්‌ ගෙනඒමට අගමැති රනිල් වික්‍රමසිංහ මහතා ඇමැති මණ්‌ඩලයට ඉදිරිපත් කළ සංදේශයකට අනුමැතිය හිමිව ඇත.
මේ සඳහා ප්‍රතිපත්ති හා නෛතික කාර්ය රාමුව කෙටුම්පත් කිරීමට නීතිය හා සාමය පිළිබඳ ඇමැතිවරයාගේ සභාපතිත්වයෙන් කමිටුවක්‌ පත් කරනු ලැබූ අතර එම කමිටුවේ නිර්දේශය පරිදි සකස්‌ කළ ප්‍රතිපත්ති හා නෛතික කාර්ය රාමුව ජාතික ආරක්‍ෂාව පිළිබඳ පාර්ලිමේන්තු ආංශික අධීක්‍ෂණ කමිටුවට ඉදිරිපත් කර මසක්‌ ඇතුළත නිරීක්‍ෂණ ලබාදීමට නියමිතය. එම නිරීක්‍ෂණ පසුව නීති කෙටුම්පත් සම්පාදන දෙපාර්තමේන්තුවට යොමු කෙරේ.
ත්‍රස්‌තවාදය මැඬලීමේ හා ඒ හා සම්බන්ධ අවශ්‍ය පියවර ගැනීමට ප්‍රමාණවත් විධිවිධාන සැලසීම, මානව හිමිකම් වගකීම් පරිපූර්ණව ඉටු කිරීම සහතික වනු පිණිස මෙම නව කෙටුම්පත සකස්‌ කිරීමට අපේක්‍ෂා කරන බව රජය පවසයි.
– දිවයින