රබර් පටියකට ගෙල සිරවීම හේතුවෙන් කලවාන, පොතුපිටිය, පනාපොල ප්‍රදේශයේ නව හැවිරිදි දරුවකු මියගොස් තිබේ.
මෙලෙස මියගොස් ඇත්තේ කන්කානම්ලාගේ ගගන නමැති දරුවෙකි. ඔහු පවුලේ එකම දරුවා බව පොතුපිටිය පොලිසිය පවසයි.
මෙම දරුවා යකඩ මිටි, බෝර යකඩ කූරුවලට රබර් පටි ගැටගසා කැරකවීම කුඩා කාලයේ සිටම විනෝදාංශයක් සේ කර තිබෙන බවත් පෙරේදා (13)දිනයේ ද නිවසේ සිටියෙදී ගල් කැඩීමට යොදාගන්නා බෝර කූරක රබර් පටියක් ගැටගසා කරකවමින් සිට ඇති බවත් පොලිස් පරීක්ෂණවලදී අනාවරණය වී තිබේ.
මෙම අවස්ථාවේ මාපියන් නිවසේ නිදාගෙන සිට ඇති අතර දරුවා මිදුලේ සෙල්ලම් කරමින් සිටියදී යකඩ කූර හිසේ වැදී රබර් පටිය ගෙල සිරවී සිට ඇත.
පැය භාගයකට වැඩි කාලයක් මිදුලේ වැටී සිටි දරුවා ගැන මාපියන් දැනගෙන ඇත්තේ අසල්වාසී දරුවකු කළ දැනුම්දීමකින් පසුව බව පොලීසිය පවසයි.
පොතුපිටිය රෝහල වෙත අසාධ්‍ය තත්ත්වයෙන් රැගෙන ආ දරුවා වැඩිදුර ප්‍රතිකාර සඳහා කලවාන රෝහල වෙත මාරු කර යවමින් සිටියදී මියගොස් තිබේ.
මාපියන්ගේ නොසැලකිල්ල මෙම මරණයට හේතුවී ඇතැයි පොලීසිය සඳහන් කරන අතර පොතුපිටිය පොලිස් ස්ථානාධිපති පොලිස් පරීක්ෂක කුමාර නලවංශ ඇතුළු නිලධාරීන් වැඩිදුර විමර්ශන සිදුකරයි.