ආණ්ඩුපෙරළියක් පිළිබදව කොළඹ දේශපාලනය ගිණිගනිමින් පවතිද්දී ජනාධිපති මෛත්‍රීපාල සිරිසේන මහතා අද පෙරවරුවේ හදිසියේම පොලොන්නරුව බලා පිටත්ව ගොස් ඇති බවට වාර්තා පලවෙයි. ජනාධිපතිවරයා සති අන්තයේ දෙදිනම පොලොන්නරුවේ රැදී සිටිනු ඇති බවද එම වාර්තා පවසයි.
මේ තත්ත්වය මත නව සන්ධාන ආණ්ඩුවක් බිහිකිරීම පිළිබදව සිදුකෙරෙන සාකච්ඡා ගැටළුකාරී තත්ත්වයකට පත්ව ඇති බවද සදහන්ය.
මේ අතර එක්සත් ජනතා නිදහස් සන්ධාන ආණ්ඩුවක් පිහිටුවීම සදහා පාර්ලිමේන්තුවේ බහුතර බලය පෙන්වීම අත්සන් කරමින් ඇති දිවුරුම් ප්‍රකාශය සදහා සරත් අමුණුගම, මහින්ද සමරසිංහ, දුමින්ද දිසානායක, විජිතමුණි සොයිසා ඇතුළු ඇමතිවරු කිහිප දෙනෙකු අත්සන් තබා නොමැති බවද සදහන් වේ.
එමෙන්ම අගමැති රනිල් වික්‍රමසිංහ මහතා ධුරයෙන් ඉවත්කර නිමල් සිරිපාල ද සිල්වා මහතා අගමැතිධුරයට පත්කිරීමට අවශ්‍ය නෛතික තීරණය මෙතෙක් ශ්‍රී ලංකා නිදහස් පක්ෂ මධ්‍ය කාරක සභාව රැස්ව ගෙන නොමැති බවද පැවසේ.
මෙම තත්වය මත මෙතෙක් ඒ වෙනුවෙන් කැප වී ක්‍රියාත්මක වූ අමාත්‍යවරු පිරිසක් ඉතා අසරණ තත්ත්වයකට පත්ව ඇත.