ඉන්දීය විදේශ කටයුතු අමාත්‍ය ආචාර්ය එස්. ජයශංකර් මහතා ඇතුළු දූත පිරිසක් දෙදින නිල සංචාරයක් සඳහා අද (19)දින මෙරටට පැමිණෙන බව විදේශ කටයුතු අමාත්‍යාංශය පවසයි.
ඉන්දීය විදේශ කටයුතු අමාත්‍යවරයා මෙරට රැඳී සිටින කාලසීමාවේ ජනාධිපතිවරයා, අග්‍රාමාත්‍යවරයා සහ විදේශ කටයුතු අමාත්‍ය අලි සබ්රි මහතා හමුවී ද්විපාර්ශවික සාකච්ඡා පැවැත්වීමට නියමිතය.
ඉන්දීය විදේශ කටයුතු අමාත්‍ය ආචාර්ය එස්. ජයශංකර් මහතා සමග ඉන්දීය විදේශ කටයුතු අමාත්‍යාංශයේ එකාබද්ධ ලේකම් පූනීත් අග්ග්‍රවාල්, අධ්‍යක්ෂ සන්දීප් කුමාර්, නියෝජ්‍ය ලේකම්වරුන් වන නීදි චවුද්ද්‍රි සහ රගූ පූරී යන අයද මෙම නිල සංචාරයට සහභාගී වේ.
මේ අතර ශ්‍රී ලංකාවට ණය ප්‍රතිව්‍යුහගත කිරීමේ සැලැස්ම අත්කරදීම සඳහා දැඩි ලෙස තම රට කැප වන බව ඉන්දියාව ජාත්‍යන්තර මූල්‍ය අරමුදලට ලිපියක් මගින් දැනුම් දී තිබේ.
ජාත්‍යන්තර මූල්‍ය අරමුදලේ ප්‍රධානී ක්ස්ටර්ලීනා ජෝර්ජියේවා මහත්මියට යොමු කළ ලිපියක දැක්වෙන්නේ, ශ්‍රී ලංකාව ණය සහන සහ ණය තිරසරභාවය අත්කරගැනීම සඳහා ගෙන යන වැඩපිළිවළට ඉන්දියාව සහය පළ කරන බවයි.
එමෙන්ම වාණිජ ණය ලබා ගත් පාර්ශවයන්ගෙන් සහ ද්විපාර්ශවික ණය ලබාගත් පාර්ශවයන්ගෙන් ශ්‍රී ලංකාව සමාන සැලකීම් අත්කරගැනීමට බලධාරීන් ක්‍රියා කළ යුතු බව ද ඉන්දියාව පවසයි.