නාඩු සහල් තොග සගවා තබා ගනිමින් පාරිභෝගිකයන්ට නාඩු සහල් නොමැති බව පැවසු ගිනිගත්හේන නගරයේ සහල් තොග වෙලෙන්දෙකු ගිනිගත්හේන පොලිසියේ නිලධාරින් සහ නුවරඑලිය පාරිභෝගික සේවා අධිකාරියේ නිලධාරින් එක්ව වැටලිමක් සිදු කර සගවා තිබු සහල් තොග පාරිභෝගික සේවා අධිකාරියේ භාරයට ගැණින.
ගිනිගත්හේන ප්‍රදේශයේ පාරිභෝගිකයන් කිහිපදෙනෙකුගෙන් ගිනිගත්හේන පොලිසියට මේ සම්බන්ධයෙන් ලද තොරතුරු කිහිපයක් මත ගිනිගත්හේන පොලිසියේ ස්ථානාධිපති ප්‍රධාන පොලිස් පරික්ෂක විරාජ් විතානගේ මහතා හැටන් කොට්ඨාශ භාර පොලිස් අධිකාරි ප්‍රදිප් වීරසේකර මහතාගේ උපදෙස් පරිදි නුවරඑලිය දිස්ත්‍රික් පාරිභෝගික සේවා අධිකාරියේ නිලධාරින්ගේ සහය ඇතිව මෙම වෙලදසැල (20) දින හදිසි පරික්ෂාවට ලක් කර ඇත.
එම පරික්ෂාවේදි එම වෙලදසැල තුල කිලෝ 10 නාඩු සහල් බැග 21 ක්, කිලෝ 05 නාඩු සහල් බැග 30 ක් ඇතුළුව නාඩු සහල් කිලෝ 360 ක් සොයාගත් අතර, එම සහල් තොග නුවරඑලිය පාරිභෝගික සේවා අධිකාරියේ භාරයට ගත් අතර, එම සහල් තොග සගවා තබා ගැනිම සම්බන්ධයෙන් එම වෙලදසැලේ හිමිකරුට එරෙහිව හැටන් මහෙස්ත්‍රාත් අධිකරණය හමුවේ නෛතික පියවර ගැනිමට කටයුතු කල බව නුවරඑලිය දිස්ත්‍රික් පාරිභෝගික සේවා අධිකාරියේ දිස්ත්‍රික් ප්‍රධානි අමිල රත්නායක මහතා පැවසිය.