පූර්ව ගනුදෙනු දිනය වූ පසුගිය අගොස්තු 30 වන දින ඒකක 10,869.07 ක් ලෙසින් සටහන් වූ සියලු කොටස් මිල දර්ශක අගය දිනය තුළ ඒකක 149.57 ක දැවැන්ත කඩා වැටීමක් වාර්තා කළ අතර ඒ අනුව දිනයේ ගනුදෙනු අවසානයේ දී එහි අගය ඒකක 10,719.50 ක් ලෙසින් වාර්තා විය.
මේ අතර අද දිනයේ දී S&P SL20 දර්ශකය ද ඒකක 51.67 ක පහළ යාමක් වාර්තා කළ අතර දිනය අවසානයේ දී S&P SL20 දර්ශක අගය ඒකක 3,006.93 ක් ලෙසින් සටහන් වී තිබුණි.
අද දින ගනුදෙනු පිරිවැටුම රු. මිලියන 615.75 ක් ලෙසින් සටහන් විය.
මෙලෙස කොටස් වෙළෙඳපොළ සියලු කොටස් මිල දර්ශකය අඛණ්ඩව පහළ ගිය 11 වෙනි දිනය අදයි. මෙම දින 11 තුළ දී සියලු කොටස් මිල දර්ශකය ඒකක 811.81කින් හෙවත් 7% කින් පහළ ගොස් ඇත.
කොටස් වෙළෙඳපොළ ක්‍රියාකාරීත්වය නිරීක්ෂණයේ දී පසුගිය ගනුදෙනු දින 7 ක කාලපරිච්ඡේදය තුළ දී ඒකක 100 ඉක්මවා සියලු කොටස් මිල දර්ශකය පහළ ගිය අවස්ථා 4ක් දැක ගත හැකි වීම විශේෂත්වයකි.
එසේම පසුගිය දින 7ක කාලපරිච්ඡේදය තුළ දී කොළඹ කොටස් වෙළෙඳපොළ, වෙළෙඳපොළ ප්‍රාග්ධනීකරණය රු. බිලියන 276.37 කින් පහළ ගොස් තිබීම ද තවත් සුවිශේෂී කාරණයකි.
පසුගිය අගෝස්තු 22 දින ගනුදෙනු අවසානයේ දී කොළඹ කොටස් වෙළෙඳපොළ, වෙළෙඳපොළ ප්‍රාග්ධනීකරණය රු. 4,531,140,100,074 ක් ලෙසින් සටහන් වූ අතර එම වටිනාකම 2 දිනයේ ගනුදෙනු අවසානයේ දී රු. 4,254,761,839,833 ක් දක්වා රු. 276,378,260,241 කින් අඩු වී තිබේ.
සරල ලෙස ගතහොත් පසුගිය ගනුදෙනු දින 07 තුළ දී රු. කෝටි 27,638 කින් කොටස් වෙළෙඳපොළේ වටිනාකම පහළ ගොස් ඇත.
සමාගමක වෙළෙඳපොළ ප්‍රාග්ධනීකරණය ගණනය කරනුයේ සමාගමේ නිකුත් කරන ලද කොටස් ප්‍රමාණය, එම සමාගමෙහි කොටසක වෙළෙඳපොළ මිලෙහි ගුණිතයක් ලෙස ගැනීමෙනි. නිකුත් කරන ලද කොටස් ප්‍රමාණය වෙනස් නොවන විට සමාගමේ කොටස් මිල උච්ඡාවචනය වන අවස්ථාවේ දී එම සමාගමේ වෙළෙඳපොළ ප්‍රාග්ධනීකරණය ද ඉහළ පහළ යනු ඇත.
මෙලෙස කොටස් වෙළෙඳපොළේ ලැයිස්තුගත කර ඇති සියලු සමාගම්වල වෙළෙඳපොළ ප්‍රාග්ධනීකරණයෙහි එකතුව සමස්ත වෙළෙඳපොළ ප්‍රාග්ධනීකරණය වේ