පාකිස්තානයේ ක්වෙටා නගරයේ සුඛෝපභෝගී හෝටල් පරිශ්‍රයක සිදුකළ බෝම්බ ප්‍රහාරයකින් 4 දෙනෙක් මියගොස් තවත් 12 දෙනෙක් තුවාල ලබා තිබේ.
බීබීසී පුවත් සේවය පැවසුවේ එම ප්‍රහාරයේ ඉලක්කය පාකිස්තානයේ සිටින චීන තානාපතිවරයා වියහැකි බවය.
ඔහු මේ වනවිට පාකිස්තානයේ ගැටුම් බහුල බැලොකිස්තාන ප්‍රාන්තයේ අගනගරය වන ක්වෙටා හි සංචාරයක නිරතව සිටී.
නමුත් ප්‍රහාරය සිදුවන අවස්ථාවේ ඔහු එම හෝටලයේ නොසිටි බව වාර්තා වේ.
විදෙස් ජාතිකයින් බහුලව ගැවසෙන සෙරීනා හෝටලයේ වාහන අංගනය ආශ්‍රිතව එම පිපිරීම සිදුකර තිබේ.
එම ප්‍රහාරය සම්බන්ධයෙන් පාකිස්තාන තලිබාන් කණ්ඩායම වගකීම භාරගෙන ඇති බව විදෙස් මාධ්‍ය පවසයි.