රජය සතුව 23%ක්ව පැවති රාජ්‍ය ආදායම මේ වනවිට 11% ක් දක්වා පහළ ගොස් ඇති බව සමාජ සවිබල ගැන්වීම සහ සුබසාධන අමාත්‍ය එස්. බී දිසානායක මහතා ප්‍රකාශ කරයි.
ඒ හේතුවෙන් රජය ලෝක බැංකුවෙන්, ජාත්‍යන්තර මූල්‍ය අරමුදලෙන් සහ ආසියානු සංවර්ධන අරමුදලෙන් හෝ වෙනත් රටකින් ආධාර ඉල්ලා සිටිය ද ඒවා ලබා ගැනීම අපහසු බවත් ඔවුන් කියාසිටින සරල කාරණය වන ශ්‍රී ලංකා රජයේ ආදායම වැඩිකර ගැනීමට කටයුතු කිරීම යන්න සත්‍ය බවත් ඒ මහතා කියාසිටී.
රටේ අත්‍යවශ්‍යය කටයුතු නඩත්තු වන්නේ රජයේ ආදායමින් වන බැවින් රජයේ අදායම් තත්ත්වය ඉහළ නංවා ගැනීම අත්‍යාවශ්‍යය කාරණයක් බව අමාත්‍යවරයා අවධාරණය කරයි.
ඒ හේතුවෙන් රජයට තාවකාලිකව යම් යම් තීරණවලට එළඹීමට සිදුවන බවත් වාහනවල මිල වැඩි කිරීමට සිදුවීම ද එලෙස තාවකාලිකව ගත් තීරණයක් බවත් අමාත්‍යවරයා වැඩිදුරටත් කියාසිටියේ ය.