ජයශ්‍රී සංගීත කණ්ඩායම විසින් ගායනා කළ මොඩ් ගොවියා ගීතය ඇතුළු ජනප්‍රිය ගීත 20 ක් ගායනා කිරීම, ප්‍රවර්ධනය කිරීම, අලෙවි කිරීම හා අන්තර්ජාලය වෙත මුදා හැරීම ලබන 31 වැනිදා දක්වා වළක්වමින්, කොළඹ වාණිජ මහාධිකරණ විනිසුරු ප්‍රියන්ත ප්‍රනාන්දු මහතා අද(17)දින වාරණ නියෝගයක් නිකුත් කළේ ය.
එම ගීත රචනා කර, තනු නිර්මාණය කළ ජයශ්‍රී සංගීත කණ්ඩායමේ සාමාජිකයෙකු වන අරුණ ලියාන් මහතා විසින් බුද්ධිමය දේපළ පනත යටතේ ගොනු කර තිබූ නඩුවක් සළකා බැලූ විනිසුරුවරයා මෙම සංගීත කණ්ඩායමේ සෙසු සාමාජිකයින් වන රෝහිත ජයලත් සහ රොහාන් ජයලත් යන දෙදෙනාට එම වාරණ නියෝගය නිකුත් කළේ ය.
තමන් ඇතුළු තිදෙනා විසින් එම සංගීත කණ්ඩායම ආරම්භ කළ බවත්, වගඋත්තරකරුවන් දෙදෙනා පමණක් මේ වනවිට එම ගීත ගායනා කිරීම මගින් තමන්ගේ සම කර්තෘ අයිතිය උල්ලංඝණය වී ඇති බවත්, පෙන්වා දෙමින් ගොනු කර තිබූ එම නඩුවේ වගඋත්තරකරුවන් ලෙස නම් කොට තිබූ රෝහිත ජයලත් සහ රොහාන් ජයලත් යන අයට ලබන 31 වැනිදා අධිකරණය හමුවේ පෙනී සිට කරුණු දක්වන ලෙස දන්වා නොතීසි යැවීමට ද විනිසුරුවරයා නියෝග කළේ ය.