හිටපු ජනාධිපති මහින්ද රාජපක්‌ෂ මහතාට ලබාදී ඇති හමුදා ආරක්ෂාව ලබන මැයි 01 වැනිදායින් පසුව ඉවත් කරන බවට ජනාධිපති මෛත්‍රිපාල සිරිසේන මහතා ඉකුත් සතියේ පැවැති ඇමැති මණ්‌ඩල රැස්‌වීමේදී දැනුම් දුන් බව කැබිනට්‌ සම මාධ්‍ය ප්‍රකාශක ඇමැති රාජිත සේනාරත්න මහතා පැවසීය. දේශපාලනඥයන්ට යුද හමුදා ආරක්ෂාව ලබා නොදීමට ආරක්‌ෂක මණ්‌ඩලය තීරණයක්‌ ගෙන ඇති බවත් ඒ අනුව මෙම තීරණය ක්‍රියාත්මක කරන බවත් ජනාධිපතිවරයා ඇමැති මණ්‌ඩලයට ප්‍රකාශ කළැයි ඇමැතිවරයා කීය.
ජනාධිපතිවරයාට හෝ අගමැතිවරයාට නොමැති හමුදා ආරක්ෂාවක් පාර්ලිමේන්තු මන්ත්‍රීවරයෙකුට අවශ්‍ය නැතැයිද හමුදා ආරක්ෂාව කිසිවකුට අවශ්‍ය නැති අතර මේ පිළිබඳව ගන්නා ක්‍රියාමාර්ග ආරක්‌ෂක මණ්‌ඩලය තීරණය කර ඇතැයිද ජනාධිපතිවරයා දැනුම්දී ඇතැයි ඇමැතිවරයා පැවසීය.
හිටපු ජනාධිපතිවරයාගේ හමුදා ආරක්ෂාව ඉවත් කරන බවට ආරක්‌ෂක ලේකම්වරයා මීට පෙර ප්‍රකාශ කළ අතර ඉන්පසුව ජනාධිපති මෛත්‍රීපාල සිරිසේන මහතා විසින් ශ්‍රී ලංකා නිදහස් පකAෂ ක්‍රියාකාරීන්ගේ හමුවකදී හිටපු ජනාධිපතිවරයාගේ හමුදා ආරක්ෂාව ඉවත් නොකරන බව ප්‍රකාශ කරනු ලැබීය.