2015 ජනවාරි මාසයේදී තමන් රටට ඉතිරි කර ගියේ 75.5 % ණය ප‍්‍රතිශතයක් බවත් එය 1979 වසරෙන් පසු තිබූ අඩුම ණයබර එය බවත් හිටපු ජනාධිපති මහින්ද රාජපක්ෂ මහතා ඉදිරියේදී සිදු කිරීමට නියමිත වැට් බදු සංශෝධනය පිළිබඳ නිවේදනයක් නිකුත් කරමින් පවසයි.
එහි දැක්වෙන්නේ වැටුප් වැඩිකර තිබෙන පසුබිමක ජනතාවට අලුතින් පනවන බදු ගෙවීමේ ප‍්‍රශ්නයක් නැතැයි ආණ්ඩුවේ ඇතැමුන් කරන ප‍්‍රකාශවල සත්‍යතාවක් නොමැති බවයි.
වැටුප් වැඩිකර ඇත්තේ වැඩකරන ජනතාවගෙන් සියයට පහළවක් වන රාජ්‍ය සේවකයින්ට බවත් ඉතිරි සියයට අසූ පහේම ආදායම් වැඩිවී නොමැති බවත් එම නිවේදනයේ සඳහන්.
ආණ්ඩුව බදු වැඩි කිරීමට සූදානම් වන්නේ ඡන්දය දිනා ගැනීමට දුන් පොරොන්දු ඉටු කර පවත්වා ගෙන යාමට මුදල් නොමැති නිසා බවයි මහින්ද රාජපක්ෂ මහතා පෙන්වා දෙන්නේ.
මෙය ප්‍රෝඩාවෙන් බලය ලබාගෙන ප්‍රෝඩාවෙන්ම පවත්වාගෙන යන වත්මන් ආණ්ඩුව මෙතෙක් සිදු කළ නරුමවාදී උප්පරවැට්ටියක් බවද එම නිවේදනයේ දැක්වෙනවා.
බදු වැඩි කිරීම්වලට එරෙහිව ජනතාව එකාමෙන් නැගී සිටිය යුත්තේ ඒ නිසා බවයි මහින්ද රාජපක්ෂ මහතා වැඩිදුරටත් පවසන්නේ.
