දඹුල්ල වෑවලවැව, සීගිරිය අලකොළවැව ප්‍රදේශවල රජයේ ඉඩම් අත්පත් කරගැනීමේ ජාවාරම් පිළිබඳව මාධ්‍යයට තොරතුරු දුන්නැයි චෝදනා කරමින් ප්‍රදේශයේ ගොවියකුට ඉකුත් 23 වැනිදා බරපතළ ලෙස පහරදී ඇතැයි දඹුල්ල පොලිසිය කියයි.
මෙසේ පහරකෑමට ලක්ව ඇත්තේ දඹුල්ල වෑවලවැව, අලකොළවැව ප්‍රදේශයේ පදිංචි ඒ.ජී. දිසානායක නොහොත් ප්‍රදේශයේ බොහෝදෙනකු හඳුනන ‘බණ්ඩා මාමා’ නමැත්තෙකි.ඔහු දඹුල්ල මූලික රෝහලේ ප්‍රතිකාර ලබමින් සිටී.
රජයේ ඉඩම් සහ වනජීවී දෙපාර්තමේන්තුවේ මෙන්ම වන සංරක්ෂණ දෙපාර්තමේන්තුවට අයත් ඉඩම් අත්පත් කරගෙන ඒවා පිටස්තර පුද්ගලයන්ට අලෙවි කිරීමේ ක්‍රියාවලිය සිදුවන බව ජනමාධ්‍ය මඟින් පසුගිය කාලය පුරා දිගින් දිගටම හෙළිදරව් විය.
එම අවස්ථාවලදී මාධ්‍යවේදීන්ට, වන සංරක්ෂණ නිලධාරීන්ට, පොලිසියට සහ වනජීවී නිලධාරීන්ට තොරතුරු ලබාදුන් බවට චෝදනා කරමින් තමන්ට පහරදී පිහියකින් ඇනීමට ද උත්සාහ කළ බව පහරකෑමට ලක් වූ පුද්ගලයා පොලිසියට ප්‍රකාශ කර ඇත.