ඒකාබද්ධ විපක්ෂයේ මන්ත්‍රීවරු ඔවුන් අතර සිටින කීප දෙනකුගේ උවමනාව අනුව හැසිරෙමින් ශ්‍රී ලංකා නිදහස් පක්ෂය දෙකඩ කිරීමට කටයුතු කරන බව විදේශ රැකියා ප්‍රවර්ධන නියෝජ්‍ය අමාත්‍ය මනූෂ නානායක්කාර මහතා පවසයි.
ඇමතිකම ලැබීමෙන් පසු පැවැත්වූ පළමු මාධ්‍ය සාකච්ඡාවට එක්වෙමින් ඊයේ (08) මේ බව කීය.
2010 මැතිවරණයේ දී එක්සත් ජාතික පක්ෂයෙන් පාර්ලිමේන්තුවට පිවිසුණ මනුෂ නානායක්කාර මහතා, පසුගිය පාර්ලිමේන්තු මහ මැතිවරණයේ දී හිටපු ජනාධිපති මහින්ද රාජපක්ෂ කඳවුර නියෝජනය කරමින් පාර්ලිමේන්තුවට යළි තේරී පත් වූ අතර ඔහු දැන් ශ්‍රී ලංකා නිදහස් පක්ෂයේ මෛත්‍රිපාල සිරිසේන ජනාධිපතිවරයාගේ පාර්ශවයට සහය පළ කරමින් ආණ්ඩුවට එක්ව නියෝජ්‍ය ඇමති පදවියක් ලබා ගත්තේය.
‘සමහරු අහනවා මම දැන් පිල් මාරු කරලද කියල. නැහැ! එදත් අදත් හෙටත් මම ශ්‍රී ලංකා නිදහස් පක්ෂයේ. මගේ පක්ෂය සම්මුතිවාදී ආණ්ඩුවට එක් වෙලා තියෙද්දී නිකම් පඩි අරන් ඉන්නවාට වඩා රට ඉදිරියට යන මේ ගමනට සහය දෙන එක හොඳයි කියලයි මේ තීරණය ගත්තේ’ නව නියෝජ්‍ය ඇමති මනූෂ නානායක්කාර මහතා වැඩිදුරටත් එහිදී පැවසිය.