ජාතික රූපවාහිනී සංස්ථා පරිශ්‍රය ඉදිරිපිට බුදු රුවට නිගරු වන ආකාරයෙන් ප්‍රදර්ශනය කර ඇති පුවරුවක් සම්බන්ධයෙන් ලැබුණු තොරතුරක් මත පූජ්‍ය මාගලකන්දේ සුදත්ත හිමි, කථිකාචාර්ය දිලන්ත විතානගේ මහතා ඇතුළු බොදු බල සේනා සංවිධානයේ නියෝජිත පිරිසක් අද පෙරවරුවේ එම ස්ථානයට ගොස් තිබේ.
සීගිරි ලදුන් බුදු සිරසට ඉහළින් පිහිටන සේ නිර්මාණය කර තිබූ එම පුවරුවෙන් බුදු රුවට නිග්‍රහයක් වන බවත්, විශේෂයෙන්ම රාජ්‍ය ආයතනයක් තුළ එවැන්නක් සිදුවීම කිසිසේතම සුදුසු නැති බවත් එහි ගිය පිරිස පෙන්වා දී ඇත.
සංස්ථා සභාපතිවරයා වෙනුවෙන් එම පිරිස සමග සාකච්ඡාවට පැමිණි සංස්ථාවේ අධ්‍යක්ෂවරයෙකු අදාළ පුවරුවේ කිසිදු වැරැද්දක් නොමැති බවට ප්‍රකාශ කර ඇති අතර පසුව දෙපිරිස අතර උණුසුම් කතාබහක්ද සිදුව ඇත.
කෙසේ වෙතත් පසුව රූපවාහනී සංස්ථාවේ සභාපතිවරයාගේ නියෝගයෙන් එම අවස්ථාවේදීම අදාළ පුවරුව ඉවත් කිරීමට කටයුතු කර ඇත.
