අලි පැටවෙකු ළගතබා ගැනීමේ චෝදනාව මත රක්ෂිත බන්ධනාගාර ගතව සිටි පූජ්‍ය උඩුවේ ධම්මාලෝක හිමියන් කොළඹ අතිරේක මහෙස්ත්‍රාත් නිශාන්ත පීරිස් මහතාගේ නියෝගයකට අනුව ඇපමත මුදා හැරුණා.
පූජ්‍ය උඩුවේ ධම්මාලෝක හිමියන් ඇප මත මුදාහරින්නැයි ඉල්ලා උන්වහන්සේගේ නීතිඥයන් හේතු 4ක් ඉදිරිපත් කර තිබුණා.
අපවත්වී වදාළ අස්ගිරි මහානායක අතිපූජ්‍ය ගලගම ශී‍්‍ර අත්ථදස්සි හිමියන්ගේ ආදාහන පූජ්‍යෝත්වයට සහභාගි විය යුතු බවත්, බන්ධනාගාර නිලධාරීන් සමග ඊට සහභාගි වීම අවමන් සහගත බවත් ඉදිරිපත් කෙරුණු පළමු හේතුව වනවා.
පූජ්‍ය උඩුවේ ධම්මාලෝක හිමියන් ප‍්‍රසිද්ධ ධර්ම කථිකයෙකු වීම ඉදිරිපත් කෙරුණු දෙවන හේතුවයි.
උන්වහන්සේ විසින් ළඟ තබාගෙන සිටි බව කියන අලි පැටවාගෙන් උන්වහන්සේ කිසිදු ආර්ථික ප‍්‍රතිලාභයක් ලබාගෙන නොතිබීම තුන් වැනි හේතුව වනවා.
අදාළ සිද්ධියේ වින්දිතයන් කිසිවෙකු නොසිටීම හතරවන හේතුවයි.
මෙම හේතු අතරින් පළමු හා දෙවන හේතු පිළිගත හැකි බවත්, එහෙත් 3 වැනි හා 4 වැනි හේතු පිළිගත නොහැකි බවත් නීතිපතිවරයා වෙනුවෙන් කරුණු දැක්වූ නීතිඥයින් කියා සිටියා.
අදාළ සිද්ධියේ වින්දිතයන් වන්නේ රජය බවයි ඔවුන් පෙන්වා දුන්නේ.