පාර්ලිමේන්තු මන්ත්‍රී රිෂාඩ් බදියුදීන්ගේ නිවසේදී පිළිස්සුම් තුවාල ලබා මියගිය 16 හැවිරිදි ඉෂාලිනි ජූඩ් දැරියගේ දේහය අද (13)දින යළි ඇයගේ ඥාතීන්ට භාරදී තිබේ.
ඒ අධිකරණ නියෝගය අනුව සිදුකළ දෙවන පශ්චාත් මරණ පරීක්ෂණයෙන් අනතුරුවය.
රිෂාඩ් බදියුදීන් මන්ත්‍රිවරයාගේ නිවසේ සේවය කළ 16 හැවිරිදි ඉෂාලිනි ජූඩ් දැරිය පිළිස්සුම් තුවාල සහිතව ජාතික රෝහලට ඇතුළත් කිරීමෙන් පසු ඉකුත් ජූලි 15 වැනිදා මියගිය අතර ඇයගේ දේහය ඩයගම පොදු සුසාන භූමියේ භූමදානය කෙරුණි.
අනතුරුව අධිකරණ නියෝග මත ත්‍රිපුද්ගල අධිකරණ වෛද්‍ය විශේෂඥ කමිටුවක් විසින් පසුගිය 30 වැනිදා දේහය යළි ගොඩගෙන පේරාදෙණිය ශික්ෂණ රෝහලේදී දෙවන පශ්චාත් මරණ පරික්ෂණය සිදුකළේය.
එම පරීක්ෂණ කටයුතු අවසන්වීමෙන් පසු අධිකරණ නියෝග මත ඇයගේ දේහය එලෙස යළි ඥාතීන් වෙත භාරදී තිබේ.
දේහය භාරගැනීම සඳහා ඇයගේ මව හා සොහොයුරා පේරාදෙණිය ශික්ෂණ රෝහල වෙත අද පැමිණ සිටියහ.
මියගිය ඉෂාලිනි ජූඩ් දැරියගේ දේහය ඩයගම පොදු සුසාන භූමියේම යළි භූමදානය කෙරෙනු ඇත.