ශ්‍රී ලංකා හින්දු සම්මේලනයේ සභාපති අරුන්කාන්තන් මහතා සහ ඉන්දීය විදේශ ඇමතිනී සුශ්මා ස්වරාජ් මහත්මිය අතර හමුවක් පසුගියදා කොළඹදී සිදුව තිබෙනවා. ඒ ඉන්දීය විදේශ ඇමතිනියගේ ශ්‍රී ලංකා නිල සංචාරය අතරතුදීයි.
ශ්‍රී ලංකාවේ බෞද්ධ සහ හින්දු ජන ප්‍රජාව අතර සංහිදියාව වර්ධනය කිරීම පිළිබදව මෙහිදී සාකච්ඡා කළ බවයි අරුන්කාන්තන් මහතා සදහන් කළේ. මෙරට ජීවත්වන හින්දු ජනතාවට බෞද්ධ සෙවණේ ඇති ආරක්ෂාව සහ රැකවරණය ඉතා ඉහළ බවත්, බටහිරින් මුදල් ලැබෙන අන්තවාදී කණ්ඩායම් බෞද්ධ හින්දු එකමුතුව විනාශ කිරීමට ගෙනයන කුමන්ත්‍රණ පිළිබදවද ඉන්දීය විදේශ ඇමතිවරිය දැනුවත් කිරීමට හැකියාව ලැබුණු බවත් ඒ මහතා ColomboToday.com සමග වැඩිදුරටත් අදහස් දක්වමින් සදහන් කළා.
දෙදෙනා සමග පැයකට වැඩි වෙලාවක් සාකච්ඡා පැවැත්වී තිබෙන අතර ඉන්දීය අග්‍රමාත්‍ය නරේන්ද්‍ර මෝදි මහතාගෙන් පෞද්ගලිකවම ලැබුණු උපදෙස් මත බෞද්ධ – හින්දු එකමුතුව වර්ධනය කිරීම සදහා පූර්ණ සහයෝගය ලබා දෙන බවද සුශ්මා ස්වරාජ් මහත්මිය මෙහිදී සදහන් කර තිබෙනවා.
ඉන්දියානු බෞද්ධ ප්‍රජාව සමගද සමීප සබදකමක් ඇති සුශ්මා ස්වරාජ් මහත්මිය ඉන්දියානු බෞද්ධ සංස්කෘතියේ හදබිමක් ලෙස සැළකෙන “සාංචි“ ප්‍රදේශය අයත් වන මැතිවරණ කොට්ඨාශය නියෝජනය කරන මන්ත්‍රීවරියද වනවා.