අඹේවෙල ගොවිපොල සමීපයේ අතහැර දමා ඇති අක්කර 30ක භූමි භාගයක් වහාම අඹේවෙල ගොවිපොලට ලබා දී එය සංවර්ධනය කිරීමට අවශ්‍ය පහසුකම් සපයන ලෙසත්, එය තෘණ වගා භූමියක් ලෙස පවත්වා ගනිමින් කිරි ගවයන්ගේ ආහාර අවශ්‍යතාව සැපයීමේ පද්ධතියට එක්කරන ලෙසත් ජනාධිපති රනිල් වික්‍රමසිංහ මහතා නුවරඑළිය දිස්ත්‍රික් ලේකම්වරයාට සහ කොමසාරිස්වරියට පසුගිය (27) දා උපදෙස් ලබා දුන්නේය.
ඒ ජනාධිපති රනිල් වික්‍රමසිංහ මහතා අඹේවෙල ගොවිපොල සමූහයට අයත් යුනයිටඩ් ඩෙයරීස් ලංකා ලිමිටඩ් අඹේවෙල නව ඒකකයේ නිරීක්ෂණ චාරිකාවකට එක් වූ අවස්ථාවේ දීය.
අඹේවෙල ගොවිපොල අයත් Ambewela Livestock Company Limited සමාගම කොළඹ කොටස් වෙළෙඳපොළේ ලැයිස්තුගත සමාගමක් වන ලංකා මිල්ක් ෆුඩ්ස් පීඑල්සී හි අනුබද්ධිත සමාගමකි. ඉහත කී තීරණය වෙළෙඳපොළ සංවේදී තොරතුරක් බැවින් සහ එය මාධ්‍ය විසින් වාර්තා කර තිබුණු බැවින් කොළඹ කොටස් වෙළෙඳපොළ විසින් ඒ සම්බන්ධයෙන් විමසීමක් ලංකා මිල්ක් ෆුඩ්ස් සමාගමෙන් සිදුකර ඇත.
ඊට ප්‍රතිචාර දක්වමින් ලංකා මිල්ක් ෆුඩ්ස් සමාගම පවසන්නේ නිල වශයෙන් දැනුම්දීමක් ලද වහාම නිල නිවේදනයක් නිකුත් කරනු ලබන බවයි.