වයස අවුරුදු 2ට වැඩි කොවිඩ් ආසාදිත දරුවන් නිවසේ රඳවා ප්‍රතිකාර කිරීමේ ක්‍රමවේදය මේ වන විට ආරම්භ කර ඇති බව කොළඹ රිජ්වේ ආර්යා ළමා රෝහලේ ස්වසන රෝග පිළිබඳ විශේෂඥ වෛද්‍ය චන්න ද සිල්වා මහතා පවසයි.
රෝග ලක්ෂණ පෙන්නුම් නොකරන හා මද රෝග ලක්ෂණ ඇති දරුවන් ද වෛද්‍ය නිරීක්ෂණය සඳහා යොමුකළ හැකි බවත් එම ප්‍රතිකාර ක්‍රමවේදයට යටත්වන දරුවන්ට නිධන්ගත රෝග හෝ දීර්ඝ කාලීන ප්‍රතිකාර ලබාගන්නා රෝගයන් නොතිබිය යුතු බව ද වෛද්‍ය චන්න ද සිල්වා මහතා සඳහන් කළේය.
නිවසේ සිට ප්‍රතිකාර කිරීමේ දී දරුවා රැකබලා ගැනීමට යම් වැඩිහිටියෙක් නිරන්තරයෙන් ළඟ සිටිය යුතු බවත්, දුරකථන මාර්ගයෙන් ප්‍රතිකාර නියම කිරීම් සිදුවන බැවින් එයට අදාළ පහසුකම් ද සැපයිය යුතු බව වෛද්‍යවරයා සඳහන් කළේය.
එවැනි කාරණා සම්පූර්ණ කර ඇති කොවිඩ් ආසාදිත දරුවන්ට ප්‍රදේශයේ සෞඛ්‍ය වෛද්‍යවරයා සම්බන්ධ කර ගනිමින් එම පහසුකම ලබාගත හැකි අතර දරුවන් ට නිවසේ සිට ප්‍රතිකාර කිරීම පිළිබඳ විමසීම් සඳහා 1390 යන දුරකථන අංකය හඳුන්වා දී ඇති අතර එයින් අදාළ උපදෙස් ලබාගත හැකිය.
කොවිඩ් -19 රෝගී තත්ත්වය බොහෝ දරුවන්ට සාමාන්‍ය වෛරස් තත්ත්වයක් බවත්, එය ශරීරයේ ප්‍රතිශක්තිකරණ ක්‍රියාවලිය තුළින් ඉබේම සුව වන බවත් පැවසු වෛද්‍ය චන්න ද සිල්වා මහතා, 1%කට වඩා අඩු ප්‍රමාණයකට විශේෂ සංකූලතා ඇතිවන බව වෛද්‍යවරයා සඳහන් කළේය.
නිවසේ සිටින කොවිඩ් ආසාදිත දරුවන් රැකබලා ගැනීමේ දී ඖෂධවලට වඩා ඔවුන් කෙරෙහි අවධානයෙන් පසුවීම වැදගත් බවත් යම් දරුවෙකු ට කොවිඩ් ආශ්‍රිතව සංකූලතාවයක් ඇති වන්නේ නම් වහාම රෝහල් ගත කිරීමට කටයුතු කළ යුතු බවත් විශේෂඥ වෛද්‍ය චන්න ද සිල්වා මහතා සඳහන් කරයි.
වෛද්‍ය නිර්දේශයකින් තොරව දරුවන්ට ඖෂධ ලබාදීමට කටයුතු කිරීම හානිදායක විය හැකි බව ද වෛද්‍යවරයා වැඩිදුරටත් පවසයි.