තම මිතුරාව ඝාතනය කළ බවට චෝදනා එල්ල වූ පුද්ගලයෙක්ට මරණ දඬුවම නියම කිරීමේ සිද්ධියක් ගම්පහ මහාධිකරණයෙන් වාර්තා විය.
ඒ අනුව ගම්පහ අංක 01 මහාධිකරණ විනිසුරු නවරත්න මාරසිංහ මහතා අදාළ චූදිතයාට මරණ දණ්ඩනය නියම කළේය.
2006 වසරේදී තම මිතුරෙක්ව නිදියහනේදී ගෙලකපා ඝාතනය කළ බවට මහින්ද රත්නායක නමැති එම විත්තිකරුට එරෙහිව චෝදනා එල්ලවී තිබුණි.
චූදිතයා 42 හැවිරිදි, ආණමඩුව මහදිවුල්වැව ප්‍රදේශයේ පදිංචිකරුවෙකි.
වතුපිටිවල, යටියන ප්‍රදේශයේ පිහිටි තාවකාලික නවාතැන්පොළකදී එවකට 22 වියේ පසුවූ චමින්ද බණ්ඩාර නමැත්තාව 2006 නොවැම්බර් 30 වනදා හෝ ඊට ආසන්න දිනකදී ඝාතනය කර තිබූ බව අධිකරණයේදී හෙළිවිය.
විත්තිකරු සහ මරණයට පත්කර තිබූ පුද්ගලයා එකම ස්ථානයක සේවය කර තිබූ අතර විත්තිකරු විවාහ වී සිටියේ ඝාතනයට ලක්වූ පුද්ගලයාගේ ඥාති සහෝදරියක් සමගිනි.
එම තැනැත්තිය සහ මරණකරු අතර අනියම් සම්බන්ධයක් ඇති බවට ඇතිවූ සැකය මත එම ඝාතනය සිදුකර ඇති බවට මහාධිකරණයේදී ප්‍රකාශ වී තිබේ.