සේරුවිල ප්‍රාදේශීය සභාවේ සභාපති අර්බුදය නිසා ප්‍රාදේශීය සභා මන්ත්‍රීවරුන්ට මාස දෙකක මන්ත්‍රී දීමනා නොලැබුණු බවත් මන්ත්‍රීවරු හරහා සිදුකරන සංවර්ධන කටයුතු මාස දෙකක සිට නැවතී සිට ඇති බවත් ප්‍රාදේශීය සභා මන්ත්‍රීවරු පවසති.
2021 මුල්‍ය වර්ෂය සඳහා ඉදිරිපත් කළ අයවැය පරාජයට පත්විමත් සමඟ සභාපතිවරයා ඉවත් කර උප සභාපතිනිය වැඩබැලීමට පත්කිරිම නිසා අර්බුදය හටගෙන තිබුණි.
ඒ අනුව හිටපු සභාපති රණසිංහ බණ්ඩා මහතා කොළඹ අභියාචනාධිකරණයේ පෙත්සමක් ගොනු කරමින් උප සභාපතිනියට වැඩ බැලීම වාරණයට ලක්කර තමන් නැවත සභාපතිධූරයේ පිහිටුවන ලෙස පෙත්සම ගොනුකර තිබේ. මේවනවිට මෙම පෙත්සම විභාගයට ගෙන ඇති අතර උප සභාපතිනියට වාරණ නියෝගය එවා තිබේ.
මේ සම්බන්ධයෙන් කළ විමසුමකට පිළිතුරු දුන් ත්‍රිකුණාමලය සහකාර පළාත් පාලන කොමසාරිස් ඒ.ජි.එස්.එල්.තෙන්නකෝන් මහතා පැවසුවේ අභියාචනාධිකරණයේ පෙත්සම විභාගය අවසන් වී තීන්දුවක් ලැබෙන තුරු කිසිවක් කළ නොහැකි බවයි. ප්‍රාදේශීය සභාවේ දෛනික කටයුතු වැටුප් ගෙවීම් පරිපාලන කටයුතු පමණක් සිදු කෙරෙන බවත් කීය.