භාවිතයෙන් ඉවත් කළ වාහන වෙන්දේසි කිරීමෙන් ශ්‍රී ලංකා වරාය අධිකාරිය රුපියල් මිලියන 40ක වාර්තාගත ආදායමක් උපයා තිබේ.
ඊයේ දිනයේ ශ්‍රී ලංකා වරාය අධිකාරියේදී මෙම වාහන වෙන්දේසිය සිදුකෙරුණු බව ශ්‍රී ලංකා වරාය අධිකාරිය සඳහන් කළේය. වරාය අධිකාරියේ භාවිතයෙන් ඉවත් කළ වාහන ටෙන්ඩර් කැඳවා විකුණා දැමීම මීට පෙර සිදුවූ අතර එහිදී විවිධ බලපෑම් හේතුවෙන් වාහන අළෙවි වී ඇත්තේ වරාය අධිකාරියට අඩු ආදායමක් ලබාදෙමින් බව සඳහන්ය.
මෙම තත්ත්වය නිරීක්ෂණය කිරීමෙන් අනතුරුව වරාය හා නාවික අමාත්‍ය අර්ජුණ රණතුංග සහ වරාය අධිකාරියේ සභාපති ධම්මික රණතුංග යන මහත්වරුන්ගේ උපදෙස් පරිදි භාවිතයෙන් ඉවත් කළ සියලු වාහන වෙන්දේසි කිරීමට තීරණය කර තිබේ.
ඒ අනුව ඊයේ පැවති වෙන්දේසියේදී වාහන 50ක් හා ඒ ආශ්‍රීත උපකරණ 33ක් වෙන්දේසි වූ බව ශ්‍රී ලංකා වරාය අධිකාරීය සඳහන් කළේය.