කොළඹ සහ ගාල්ල වරායවල නැංගුරම් ලා ඇති නැව්වල සේවය කිරීම සඳහා විදේශීය නාවිකයන් 55 දෙනෙකු ගුවන්යානා 03කින් කටුනායක සහ මත්තල ගුවන් තොටුපළ වෙත පැමිණ තිබේ.
එලෙස පැමිණි පළමු කණ්ඩායම වූ විදේශීය නාවිකයන් 26 දෙනෙකු ඊයේ (16) දෝහා සිට පැමිණි කටාර් ගුවන් සේවයේ කිව්.ආර්. – 668 දරණ ගුවන් යානයෙන් කටුනායක ගුවන්තොටුපළ වෙත පැමිණ තිබුණි.
මේ අතර තවත් විදේශීය නාවිකයන් 21 දෙනෙකු ඊයේ රාත්‍රී 10.20ට ඉන්දියාවේ චෙන්නායි සිට පැමිණි ඉන්ඩිගෝ ගුවන් සේවයේ 6 – ඊ 9115 දරණ ගුවන් යානයෙන් ගාල්ල වරායේ නවතා ඇති නැවක සේවය කිරීම සඳහා මත්තල ගුවන් තොටුපළ වෙත පැමිණ තිබුණි.
එම ගුවන් යානය ඊයේ පස්වරුවේ මෙරට රැඳී සිටි විදේශීය නාවිකයන් 25 දෙනෙකු රැගෙන යළි ඉන්දියාවේ චෙන්නායි බලා පිටත්විය.
එමෙන්ම අද (17) අලුයම 1.00ට පමණ දෝහා සිට පැමිණි කටාර් ගුවන් සේවයේ කිව්.ආර්.- 668 දරණ ගුවන් යානය විදේශීය නාවිකයන් 08 දෙනෙකු රැගෙන කටුනායක ගුවන් තොටුපළ වෙත පැමිණ තිබුණි.
එලෙස පැමිණි කටාර් ගුවන් සේවයේ ගුවන්යානය කටුනායක ගුවන්තොටුපළේ රැඳී සිටි විදේශිකයන් 145 දෙනෙකු රැගෙන යළි දෝහා බලා පිටත්ව ගොස් ගිය බව “අද දෙරණ“ වාර්තාවේ.