මෙරට පාසල් දරුවන් ප්‍රවාහනය කෙරෙන වාහන සඳහා කහ වර්ණය අනිවාර්ය කිරීමට පියවර ගන්නා බව ප්‍රවාහන සේවා කළමනාකරණ අමාත්‍යාංශය පවසයි.
ඒ අනුව ඉදිරියේ දී පාසල් සිසු දරුවන් ප්‍රවාහනය සඳහා ආනයනය කෙරෙන වාහන කහ වර්ණයෙන්ම පමණක් ආනයනය කිරීමට තීරණය කර ඇත.
ඊයේ පස්වරුවේ (07)දින ප්‍රවාහන අමාත්‍ය මහින්ද අමරවීර මහතා සහ පාසල් සිසුන් ප්‍රවාහනය කෙරෙන වාහන සංගම් හා පොලිස් නිලධාරීන් අතර සාකච්ඡාවක් පවත්වා ඇත.
එහිදී අමාත්‍යවරයා විසින් මෙම යෝජනාව ඉදිරිපත් කර ඇති අතර ඊට පොලිස් නිලධාරින් මෙන්ම සිසුන් ප්‍රවාහනය කෙරෙන සංගම්වල නියෝජිතයින් ද එකඟත්වය පළ කර ඇත.
මාර්ග තුළ විනය පවත්වාගෙන යාම සඳහා මෙම තීරණය හේතුවන බව ප්‍රවාහන සේවා කළමනාකරණ අමාත්‍යාංශය පවසයි.
පාසල් සිසුන් ප්‍රවාහනය කෙරෙන වාහන සඳහා කහ වර්ණය භාවිත කිරීමෙන් එකී වෑන් රථ පාසැල් දරුවන් ප්‍රවාහනය කරන වෑන් රථ බව සෙසු වාහන රියදුරන්ට පහසුවෙන් අවබෝධ කර ගත හැකි බැවින් මෙම තීරණය ගත් බව අමාත්‍යාංශය පවසයි.