කරුණු තුනකට එකඟ වන්නැයි ජනාධිපති මෛත්‍රීපාල සිරිසේන මහතා තමා ඇතුළු මන්ත්‍රීවරුන් හය දෙනෙකුගෙන් ඉල්ලා සිටි බවත් තමන් ඒ කරුණු තුනම ප්‍රතික්ෂේප කළ බවත් දෙමළ ප්‍රගතිශීලි සංධානයේ නායක පාර්ලිමේන්තු මන්ත්‍රී මනෝ ගනේෂන් මහත් මාධ්‍ය හමුවකදී අද (7) පැවැසීය.
ජනාධිපතිගේ ආරාධනයකට අනුව අද (7) තමා ඇතුළු මන්ත්‍රීවරුන් හය දෙනා ගිය අවස්ථාවේ මෙම ඉල්ලීම් තුන කළ බව මනෝ ගනේෂන් මහතා කීවේය.
නව ආණ්ඩුව එක්වී සහය දීම ජනාධිපතිගේ පළමු ඉල්ලීම වූ බවත් ඊට එකඟ නොවූ විට පාර්ලිමේන්තුවේ බහුතරය විමසීමේදී ඡන්දය නොදී සිටින ලෙස ජනාධිපතිවරයා ඉල්ලා සිටි බවත් මනෝ ගනේෂන් මහතා පැවැසීය.
තමා ඇතුළු මන්ත්‍රී කණ්ඩායම එම ඉල්ලීමට එකඟ නොවූ විට එක්සත් ජාතික පෙරමුණ බහුතරය පෙන්වුවහොත් රනිල් වික්‍රමසිංහ මහතා යලි අගමැති ලෙස පත් කිරීමට විරුද්ධ වන්නැයි ජනාධිපතිවරයා ඉල්ලා සිටි බව කීය.
ජනාධිපති ඉදිරිපත් කළ කරුණු තුනම ප්‍රතික්ෂේප කළ තමා ඇතුළු මන්ත්‍රී කණ්ඩායම රනිල් වික්‍රමසිංහ මහතා සමඟ වැඩ කරන්නට නොහැකි නම් නියමිත කාලයට පෙර ජනාධිපතිවරණය පවත්වා සුදුසු තීරණයක් ගන්නා ලෙස ජනාධිපති මෛත්‍රීපාල සිරිසේන මහතාගෙන් ඉල්ලා සිටි බවද මනෝ ගනේෂන් මහතා සඳහන් කළේය.