හිටපු අමාත්‍ය පාර්ලිමේන්තු මන්ත්‍රී කෙහෙළිය රඹුක්වැල්ල මහතා අත්අඩංගුවට ගෙන අධිකරණයට ඉදිරිපත් කරන මෙන් යාපනය මහේස්ත්‍රාත් අධිකරණය වරෙන්තු නිකුත් කර ඇත. අතුරුදන් වූ ලලිත කුමාර්, වීරරාජු සහ කූගන් මුරුගානන්දන් අතුරුදන් වීම සම්බන්ධ නඩුව විභාගයට ගැනුණු අවස්ථාවේ යාපන මහේස්ත්‍රාත් පී.සිවකුමාර් මහතා විසින් මෙම වරෙන්තු නිකුතු කර ඇත.
කෙහෙළිය රඹුක්වැල්ල මහතා පසුගිය රජයේ කැබිනට් ප්‍රකාශකවරයාව සිටිය දී අදාල අතුරුදන් වීම සම්බන්ධයෙන් එකිනෙකට පරස්පර අදහස් දක්වා ඇති බව ඔවුන්ගේ ඥාතීන් චෝදනා කර ඇත. එම නඩුවට අදාලව අධිකරණයේ පෙනී සිටින මෙන් කෙහෙළිය රඹුක්වැල්ල මහතාට තුන් වතාවක්ම නොතීසි නිකුත් කර ඇතත් ඔහු අධිකරණයේ පෙනී නොසිටීම හේතුවෙන් ඔහුව වහාම අත්අඩංගුවට ගෙන අධිකරණය ඉදිරිපත් කරන ලෙස වරෙන්තු නිකුත් කර ඇත.