තමා සැබෑ ලෙසම නියෝජ්‍ය පොලිස්පතිවරයෙකු වූවා නම් විමල් වීරවංශ මහතා මේ වනවිට රක්ෂිත බන්ධනාගාරගතව සිටින බව ජනතා විමුක්ති පෙරමුණේ නායක අනුර කුමාර මහතා සඳහන් කළේය.
ඔහු මේ බව පැවසුවේ අනුර කුමාර දිසානායක නියෝජ්‍ය පොලිස්පති කෙනෙකුගේ චරිතය (DIG අනුර කුමාර ) නිරූපණය කරන බවට විමල් වීරවංශ මහතා ඒකාබද්ධ විපක්ෂයේ මාධ්‍ය හමුවේදී කරන ලද ප්‍රකාශයට පිළිතුරු ලෙසය.
ජවිපෙ නායකවරයා මේ බව පැවසුවේ, අද (03දා) පැවැති මාධ්‍ය සාකච්ඡාවකදීය.
පසුගියදා ඒකාබද්ධ විපක්ෂයේ මාධ්‍ය හමුවේදී විමල් වීරවංශ මහතා අනුර කුමාර දිසානායක මහතා DIG අනුර කුමාර ලෙස පවසා සිටියේය.
නිවාස ඇමතිව සිටියදී විමල් වීරවංශ මහතා නියමිත වටිනාකමට අඩුවෙන් නිවාස පහක් තම ඥාතීන්ට ලබා දි තිබෙන බවත්, එය වරදක් බවද ඒ මහතා පවසා සිටියේය.
නිවාස අධිකාරියේ දින පොත් මුද්‍රණය කිරීමට ලක්ෂ 140 ක් වියදම් කර තිබෙන බවත්, විදේශ ගමන් බලපත්‍ර ගැටලු සම්බන්ධයෙන් ප්‍රශ්නයක් තිබුණ බවද දිසානායක මහතා සඳහන් කළේය.
මීට අමතරව නිවාස අමාත්‍යාංශය තුළ වැඩ නොකළ පිරිස්වලට වැටුප් ගෙවා තිබෙන බවත්, මේ නිසා තමා නියෝජ්‍ය පොලිස්පති කෙනෙකු නොවීම ගැන විමල් සතුටු විය යුතු බවද පවසා සිටියේය