ආගමික සහ ජාතික අසමගිය ඇතිවන අයුරින් වෛරී ප්‍රකාශ කරන පුද්ගලයන්ට දඬුවම් ලබාදීම සඳහා අපරාධ නඩු විභාග සංග්‍රහයට සහ දණ්‌ඩ නීති සංග්‍රහයට අදාළව ගෙන ඒමට නියමිතව තිබී තාවකාලිකව නතර කළ පනත් කෙටුම්පත් සංශෝධන සහිතව යළි පාර්ලිමේන්තුවට ගෙන එන බව ජනමාධ්‍ය නියෝජ්‍ය ඇමැති කරුණාරත්න පරණවිතාන මහතා පැවැසීය.
මෙම පනත් කෙටුම්පත් මගින් ප්‍රකාශකගේ අයිතියට බාධා වන බවට මාධ්‍ය ප්‍රධානීන් පෙන්වා දුන් කරුණු සැලකිල්ලට ගෙන එය තාවකාලිකව නතර කළ බව ද නියෝජ්‍ය ඇමැතිවරයා කියා සිටියේය.
ඉදිරියේදී මෙම පනත් කෙටුම්පත් ප්‍රකාශන අයිතියට බාධා නොවන අයුරින් සංශෝධන සහිතව ගෙන එන බව කියා සිටි නියෝජ්‍ය ඇමැතිවරයා ප්‍රකාශන අයිතියට නිදහස තිබිය යුතු සේ ම ජාතික සමගිය ඇතිවන අයුරින් ක්‍රියා කිරීමට අවශ්‍ය පරිසරය ගොඩනැඟීම වත්මන් රජයේ පිළිවෙත බව ද කියා සිටියේය.