වැලිකඩ බන්ධනාගාර සිද්ධිය සම්බන්ධයෙන් අත්අඩංගුවට ගෙන රක්ෂිත බන්ධනාගාර ගත කෙරුණු පොලිස් මත්ද්‍රව්‍ය නාශක කාර්යංශයේ හිටපු පොලිස් පරීක්ෂක නියෝමාල් රංගජීව මහතා ඇප මත මුදා හැරීමට අභියාචනාධිකරණය අද (25) තීරණය කර තිබේ.
නියෝමාල් රංගජීව මහතා වෙනුවෙන් ඉදිරිපත් වූ ප්‍රතිශේධන පෙත්සමක් සලකා බැලීමෙන් අනතුරුව රුපියල් ලක්ෂ 02 බැගින් වූ ශරීර ඇප දෙකක් මත ඔහු මුදා හැරීමට අභියාචනාධිකරණය නියෝග කර ඇත.
නියෝමාල් රංගජීව මහතාගේ විදෙස් ගමන් තහනම් කිරීමටද අධිකරණය නියෝග කර ඇති අතර සෑම ඉරිදා දිනකම අපරාධ පරීක්ෂණ දෙපාර්තමේන්තුව හමුවේ පෙනී සිටින ලෙසද ඔහුට නියෝග කර තිබේ.
මීට අමතරව 2012 වසරේ වැලිකඩ බන්ධනාගාරයේ ඇතිවූ සිද්ධිය සම්බන්ධයෙන් නියෝමාල් රංගජීව මහතා සමගම රක්ෂිත බන්ධනාගාර කර සිටි හිටපු බන්ධනාගාර කොමසාරිස් එමිල් රන්ජන් ලමාහේවා මහතාගේ ප්‍රතිශෝධන පෙත්සමද අභියාචනාධිකරණය හමුවේ සලකා බැලීමට නියමිතය.