මීළඟට පැවැත්වීමට නියමිත ජනාධිපතිවරණයේදී ලංකා නිදහස් පක්ෂයේ අපේක්ෂකයා වන්නේ වත්මන් ජනාධිපති මෛත්‍රීපාල සිරිසේන මහතා බව එම පක්ෂයේ මාධ්‍ය ප්‍රකාශක මහින්ද සමරසිංහ පාර්ලිමේන්තු මන්ත්‍රීවරයා සඳහන් කරයි.
ශ්‍රීලනිප මූලස්ථානයේ දී පැවති මාධ්‍ය හමුවක් අමතමින් ඔහු කියා සිටියේ මෛත්‍රීපාල සිරිසේන මහතා මීළඟ ජනාධිපති අපේක්ෂකයා ලෙස ඉදිරිපත් කිරීමට සියලුම ශ්‍රී ලංකා නිදහස් පක්ෂ මන්ත්‍රීවරුන් ගේ සහාය ලැබෙන බවයි.
පසුගියදා පැවති පළාත් පාලන මැතිවරණයේ ප්‍රතිඵලය අනුව ශ්‍රී ලංකා පොදුජන පෙරමුණ සහ ශ්‍රී ලංකා නිදහස් පක්ෂයට ලැබුණු ඡන්ද වල එකතුව ප්‍රතිශතයක් ලෙස 57% පමණ වන බවත් ඒ ප්‍රතිඵලය අනුව මෛත්‍රීපාල සිරිසේන මහතාට ජනාධිපතිවරණය පහසුවෙන් ජය ගත හැකි බවත් ඔහු සඳහන් කළේය.
මෙම වසරේ නොවැම්බර් මාසය පමණ වන විට නව ජනාධිපතිවරණයක් කැඳවා ඊළඟ වසරේ ජනවාරි 8 වැනිදා වනවිට නව ජනාධිපති ධුර කාලය ආරම්භ වනු ඇතැයිද ඔහු කියා සිටියේය.