පොල්ගහවෙල නගරයේ මුඛ ආවරණ නොපැළඳ වෙළඳසැල් හා ප්‍රසිද්ධ ස්ථානවල සිටි පුද්ගලයින් 40 කින් 30 දෙනෙකු හට රුපියල් 5000 බැගින් දඩයක් ගෙවන ලෙස පොල්ගහවෙල මහේස්ත්‍රාත් පී .එන් ප්‍රියදර්ශනී මහත්මිය අද (6)දින නියෝග කළාය.
ඉතිරි සැකකරුවන් 10 දෙනා හට ඉදිරි නඩු දිනයක අධිකරණයේ පෙනී සිටින ලෙසද මහේස්ත්‍රාත්වරිය නියෝග කළාය.
නව සෞඛ්‍ය නීති ඇතුළත් ගැසට් පත්‍රයට අනුව මහජන ආරක්ෂාව සඳහා මොවුන්ට විරුද්ධව නඩු පැවරූ බව පොල්ගහවෙල මහජන සෞඛ්‍ය පරීක්ෂක මහේෂ් අමාකර මහතා සැකකරුවන් අධිකරණයට ඉදිරිපත් කරමින් කරුණු දැක්විය.
සෞඛ්‍ය නීති පිළිබඳ මහජනතාව දැනුවත් කර තිබියදීත් සෞඛ්‍ය ආරක්ෂක ක්‍රමවේද හා මුඛ ආවරණ නිසි ලෙස නොපැළඳ පොදු ස්ථානවල හා මහමග ගැවසුණ හොත් ඔවුන්ට එරෙහිව නඩු පැවරීමට සිදුවන බව පොල්ගහවෙල මහජන සෞඛ්‍ය වෛද්‍ය නිලධාරි කාර්යාලයේ මහජන සෞඛ්‍ය පරීක්ෂකවරු පවසති.