කොවිඩ් හමුවේ වසාදැමුණු සිනමා ශාලා යළි විවෘත කිරීමට චීනය සූදානම් වේ.
ඒ සමාජ දුරස්ථභාවය පවත්වාගෙන යාම ඇතුළු සෞඛ්‍යාරක්ෂිත ක්‍රමවේද අනුගමනය කරමිනි.
කොවිඩ් 19 වසංගත තත්ත්වය හේතුවෙන් වසා දැමුණු චීනයේ සිනමා ශාලා ලබන සතියේ සිට නැවත විවෘත කිරීමට අවසර ලබා දී තිබේ.
නව ආසාදිතයන් වාර්තා වීම අඩු වෙමින් දෛනික කටයුතු ක්‍රමයෙන් යථා තත්ත්වයට පත්වීම හේතුවෙන් සිනමා ශාලා විවෘත කිරීමට චීන රජය අවසර ලබා දී ඇති බව වාර්තා වේ.
සමාජ දුරස්ථභාවය පවත්වාගෙන යාම ඇතුළු සෞඛ්‍යාරක්ෂිත ක්‍රමවේද අනුගමනය කරමින් සිනමා ශාලා විවෘත කිරීමට අවසර දී ඇති බව විදෙස් මාධ්‍ය වාර්තා කරයි.
ආසන ධාරිතාවෙන් සියයට 30ක පමණ පිරිසකට සිනමා ශාලා තුළට පිවිසීමට අවසර හිමිවන අතර මුඛ ආවරණ පැළඳීම අනිවාර්ය වේ.
චීනයේ හුබෙයි පළාතේ වූහාන් නගරය කේන්ද්‍ර කරගෙන කොවිඩ් වෛරසයේ ව්‍යාප්තිය ආරම්භ වන්නේ පසුගිය වසරේ අග භාගයේ දීය.
අනතුරුව වසාදැමුණු එරට සිනමා ශාලා යළි විවෘත කෙරෙන්නේ මාස 6කට පසුව බව විදෙස් වාර්තා වැඩිදුරටත් සඳහන් කළේය.