ශ්‍රී ලංකා ක්‍රිකට් ආයතනයේ ප්‍රධාන විධායක නිලධාරියා (Cheif Executive Officer), ප්‍රධාන මෙහෙයුම් නිලධාරියා (Cheif Operating Officer) ඇතුළු අනෙකුත් අංශ ප්‍රධානීන්ගේ ප්‍රයෝජනය සඳහා රු. ලක්ෂ 1080ක් (රු. කෝටි 10කට වඩා) වටිනා ප්‍රංශයේ නිෂ්පාදිත ආසන 07ක් සහිත සුපිරි පර්ජෝ ජීප් රථ 08ක් ගෙන්වීමට පියවර ගෙන තිබේ. මෙහි එක පර්ජෝ රථයක මිල වනුයේ රු. ලක්ෂ 135කි.
මේ වනවිට එහි මූලික අදියර වශයෙන් රු. ලක්ෂ 135 බැගින් වන සුපිරි ජීප් රථ (Peugeot 5008 SUV GT Line 1.6L Turbo Petrol-2018) 04ක් ගෙන්වා ඇති අතර, එහි එන්ජිං ධාරිතාව ලෙස සටහන් වන්නේ 1600සී.සී.-2000සී.සී. වශයෙනුයි.
මෙම සුපිරි ජීප් රථ මෙරටට ගෙන්වා ඇත්තේ හිටපු පරිපාලනය යටතේ ලබාදුන් තීන්දුවකට අනුවයි. එහි ටෙන්ඩරය ගොස් තිබෙනුයේද හිටපු පරිපාලනයේ ප්‍රධානියෙකුගේ ඥාතියෙකුගේ සමාගමකටය.
මේ අතර ශ්‍රී ලංකා ක්‍රිකට් කණ්ඩායමේ ජාතික පුහුණුකරු චන්දික හතුරුසිංහ මහතාට සහ මූල්‍ය අක්‍රමිකතාවකට සම්බන්ධ පරිපාලන අංශ ප්‍රධානියාද මින් සුපිරි ජීප් රථ ලබාදීමට නියමිත බව අනාවරණය වේ.
මූල්‍ය අක්‍රමිකතාවකට සම්බන්ධ පරිපාලන අංශ ප්‍රධානියා මෙම ජීප් රථය ලබාගෙන ඇත්තේද නිසි අවසරයකින් තොරව බවද වාර්තා වේ. ඊට හේතුව ශ්‍රී ලංකා ක්‍රිකට් ආයතනයට ලැබිය යුතු තරග විකාශන මුදල් වෙනත් ගිණුමකට මාරු කිරීමට උත්සාහ කළේ යැයි එම වරදට චුදිතයෙකුවී සිටින මූල්‍ය අංශයේ ප්‍රධානියාට ගෙනා ජීප් රථය පරිපාලන අංශ ප්‍රධානියා ලබාගෙන තිබීම හේතුවෙනි.
මේ වනවිට ශ්‍රී ලංකා ක්‍රිකට් ආයතනයේ මූල්‍ය අක්‍රමිකතා රාශියක් සිදුව ඇති බව හෙළිවන අතර, එවැනි පසුබිමක් මධ්‍යයේ ක්‍රිකට් ආයතනයේ ලොක්කන්ට සැප වාහන ගෙන්වීම සම්බන්ධයෙන් සේවකයන්ගේ බලවත් විරෝධය එල්ල වී තිබේ.
Ada.lk