කොරෝනා වෛරසය හේතුවෙන් මියයන පුද්ගලයන් ආදාහනය නොකොට භූමිදානය කිරීම සඳහා අවසර ලබා දෙන ලෙස ඉල්ලමින් මුස්ලිම් සහ ක්‍රිස්තියානි කණ්ඩායම් කිහිපයක් විසින් ගොනුකර තිබු මූලික අයිතිවාසිකම් පෙත්සම් නිෂ්ප්‍රභා කිරීමට ශ්‍රේෂ්ඨාධිකරණය අද(01) තීන්දු කර තිබෙනවා.
අගවිනිසුරු ජයන්ත ජයසුරිය, මුර්දු ප්‍රනාන්දු, පද්මන් සුරසේන යන මහත්වරුන්ගෙන් සමන්විත විනිසුරු මඩුල්ලක් විසින් මෙම තීරණය ලබා දී ඇත.
පැමිණිලිකාර පාර්ශවය වෙනුවෙන් ජනාධිපති නීතිඥ එම්.ඒ සුමන්තිරන්, ජනාධිපති නීතිඥ ෆයිසර් මුස්තාෆා, පුලස්ති රූපසින්හ, කනිශ්කා දේවේන්ද්‍ර, පුලස්ති හේවාමාන්න යන මහත්ම මහත්මීන්ගෙන් සමන්විත නීතිඥ මඩුල්ලක් පෙනී සිටින ලදි.
නීතිපති දෙපාර්තමේන්තුව වෙනුවෙන් ජෙශ්ඨ නියෝජ්‍ය සොලිසිටර් ජෙනරාල් නෙරින් පුල්ලේ සහ කනිෂ්ක බාලපටබැඳි යන මහත්වරු ද මහාචාර්ය මෙත්තිකා විතානගේ මහත්මිය වෙනුවෙන් ජනාධිපති නීතිඥ සංජීව ජයවර්ධන සමග නීතිඥ රුක්ෂාන් සේනාධීර මහතා පෙනී සිටින ලදි.