මතභේදයට තුඩු දී ඇති MCC ගිවිසුම ආණ්ඩුව අත්සන් නොකරන බව ශ්‍රී ලංකා පොදුජන පෙරමුණේ කොළඹ දිස්ත්‍රික් අපේක්ෂක අමාත්‍ය විමල් වීරවංශ මහතා පවසයි.
එළැඹෙන මහ මැතිවරණය වෙනුවෙන් බෙල්ලන්විල රජ මහා විහාරස්ථානයේදී ඊයේ පස්වරුවේ මහා සංඝ රත්නය ඉදිරිපිට හෘද සාක්ෂියේ සමාජ ගිවිසුම හෙවත් එකුන් විසි ප්‍රතිඥාව ලබා දීමෙන් අනතුරුව අමාත්‍යවරයා මේ බව සඳහන් කළේය.
ජාතික නිදහස් පෙරමුණේ නායක හා ශ්‍රී ලංකා පොදුජන පෙරමුණේ කොළඹ දිස්ත්‍රික් අපේක්ෂක අමාත්‍ය විමල් වීරවංශ මහතා බෙල්ලන්විල රජ මහා විහාරස්ථානයට පැමිණ මහා සංඝරත්නයේ සුවදුක් විමසා බැලුවේය.
අනතුරුව විමල් වීරවංශ මහතා එකුන් විසි ප්‍රතිඥාව හෙවත් හෘද සාක්ෂියේ සමාජ ගිවිසුම නමින් කරුණු 19 කින් සමන්විත ප්‍රතිඥාව මහා සංඝ රත්නය ඉදිරියේ ලබා දුන්නේය.