පූජ්‍ය ගලගොඩඅත්තේ ඤාණසාර හිමියන්ට එල්ලවී ඇති චෝදනාවලට අදාලව අධිකරණමය කටයුතුවලින් උන්වහන්සේ සම්පූර්ණයෙන් නිදහස් කර ගැනීමට උපරිම ශක්තිය යොදවා ක්‍රියාකරන බව කෝට්ටේ ශ්‍රී කල්යාණි ධර්ම මහා සංඝ සභාවේ මහානායක අතිපූජ්‍ය ඉත්තෑපානේ ධම්මාලංකාර නාහිමියෝ පවසති.
බොදු බල සේනා මහා ලේකම් පුජ්‍ය ගලගොඩඅත්තේ ඥානසාර හිමි ඇතුළු නියෝජිතයන් පිරිසක් මහා නායක හිමි බැහැදැකීමට ගිය අවස්ථාවේ උන්වහන්සේ මෙම අදහස් පලකර සිටියේය.
ඒ පිළිබදව උන්වහන්සේ වැඩිදුරටත් මෙසේ අදහස් දක්වා සිටියේය.
අපේ ගලගොඩඅත්තේ ඥානසාර ස්ථවීරයන් අපේ සංඝ සභාවේ භික්ෂුන් වහන්සේ නමක්. ඒ නිසා අපිට විශේෂ වගකීමක් පැවරෙනවා උන්වහන්සේ වෙනුවෙන් කටයුතු කිරීමට. එසේ කටයුතු මේ දක්වා ලේකකාධිකාරී හිමිගේ මැදිහත් වීමෙන් කෙරිලා තිබෙනවා. අපි නීතියට අතගහන්නේ නෑ . නමුත් සිදුවූ දේ පිළිබඳව සහ එහි නියම තත්වය පිළිබඳව පැහැදිලි කරලා ලබාගත හැකි උපරිම නිදහස ලබාගැනීමයි අත්‍යවශ්‍යව තිබෙන්නේ.
ඒ සඳහා මටත් මේ රටේ සංඝයාටත් පුළුවන් උපරිම ශක්තිය යොදවලා කටයුතු කරන බව මේ වෙලාවේ විශේෂයෙන්ම මතක් කරනවා. මා බලාපොරොත්තු වෙනවා ජනාධිපතිවරයාටත් අගමැතිවරයාටත් මේ ගැන පැහැදිලි කිරීමක් කරලා මේ තත්වය මෙයින් අවසන් කිරීමට අවශ්‍ය වැඩපිළිවෙල ගැනීම පිළිබඳව නායකත්වයක් මුලිකත්වයක් ගැනීමට සුදානම් බවත් මේ වෙලාවේ සඳහන් කිරීමට කැමතියි.
ජනාධිපතිවරයාත්, අගමැතිවරයාත් මේ පිළිබඳව දැනුවත්ව සිටින්නේ මං හිතනවා. අපේ ලේකකාධිකාරී අනුනායක ස්වාමින් වහන්සේ වාර කිහිපයක් ජනාධිපතිතුමාට කරුණු පැහැදිලි කර තිබෙනවා. ඒ නිසා මටත් දිය හැකි උපරිම ශක්තිය යොදවා ඒ පිළිබඳව කරුණු පැහැදිලි කර මේ තත්වයට විසඳුමක් ගැනීමට බලාපොරොත්තු වෙන බව ප්‍රකාශ කිරීමට කැමතියි.
