මෝටර් රථයේ ජනෙල් කවුළුව මත ඉඳගෙන අධිවේගී මාර්ගයේ අපරික්ෂාකාරී ලෙස ගමන් ගත් පුද්ගලයන්ට අද (12) අධිවේගී මාර්ග කොට්ඨාසයේ පොලිස් ඒකකයට පැමිණෙන ලෙස දැනුම් දී ඇතැයි පොලිස් මාධ්‍ය ප්‍රකාශක නියෝජ්‍ය පොලිස්පති අජිත් රෝහ මහතා පවසයි.
මෙම සිද්ධියේදී අදාළ මෝටර් රථය පැදවූ රියැදුරුට මෙන්ම එහි අන්තරාකාරී ලෙස ගමන් ගත් සියලු දෙනාට ද නඩු පවරන බව හෙතෙම කීය .
මෙම මෝටර් රථයේ මුල් හිමිකරු මහනුවර පේරාදෙණිය පාරේ පදිංචිකරුවකු බවත් 2015 වසරේ ඔහු එම මෝටර් රථය මහනුවර අකුරණ ප්‍රදේශයේ පුද්ගලයකුට අලෙවි කර ඇති බවද හෙතෙම කීය.
රථයේ මුල් හිමිකරු පොලිසියට කැඳවා ඇති අතර ඒ සමග අදාළ මෝටර් රථයේ ගමන් ගත් පිරිස ද කැඳවාගෙන එන ලෙස ඔහුට දැනුම් දුන් බව ද පොලිස් මාධ්‍ය ප්‍රකාශකවරයා වැඩිදුරටත් කීය.