සෞදි ආරාබියේදී ගල් ගසා මරා දැමීමට නියම වූ ශ්‍රී ලාංකික කාන්තාවගේ ජීවිතය බේරාගැනීමට කටයුතු කරන මෙන් ඉල්ලමින් ජාතික සංඝ සම්මේලනය අද (02) සෞදි අරාබි තානාපතිවරයාට ලිපියක් බාර දී ඇත.
තවත් ශ්‍රී ලාංකික තරුණයෙකු සමග අනියම් ඇසුරක් පැවැත්වූවාය යන චෝදනාව මත මරදාන ප්‍රදේශයේ පදිංචි එම කාන්තාව සෞදි අධිකරණය මගින් මෙලෙස ගල් ගසා මැරීමට තීන්දු කර ඇත.
“ගෝත්‍රික වැඩවසම් යුග පසුකර ප්‍රජාතන්ත්‍රවාදී අවධියකට ලෝකය පැමිණ ඇති බැවින් මිනිසාගේ ජීවත්වීමෙ අයිතිය තහවුරු කරන ලෙස සංඝ සම්මේලනය එම ලිපියෙන් ඉල්ලා ඇත.
කෙසේ වෙතත් ඇයට නියම කෙරුණු දඬුවම ලිහිල් කර ගැනීම සඳහා විදේශ රැකියා අමාත්‍යංශය සෞදි රජයෙන් ඉල්ලීමක් කර ඇති බව වාර්තා වේ.
එනමුත් සෞදි අරාබියේ ශ්‍රී ලංකා තානාපති අස්මි තාසීම් පසුගිය දෙනෙක අරාබි පුවත් පතකට පවසා තිබුනේ මෙලෙස සෞදි අරාබි නීතියට අනුව එම කාන්තාව මරා දැමීම තමන් අනුමත කරන බවයි. සෞදියේ නීතියට අනුගත වීමට බැරිනම් එරටට නොපැමිණිය යුතු බවත්, එම නීති ශ්‍රී ලංකාවේ මාධ්‍ය මගින් විවේචනය කිරීම තමන් හෙළා දකින් බවත් ඔහු පවසා තිබිණි.
