වෙළෙඳපොළේ සහල් මිල ඉහළ යැම වැළැක්‌වීම සඳහා පෞද්ගලික අංශය හරහා සහල් ආනයනය කිරීමට ඇමැති මණ්‌ඩලය තීරණය කර ඇත.
ආනයනික සහල් තොග ආරක්‍ෂිත තොගයක් ලෙස ගුදම්වල ගබඩා කිරීමටත් ඇමැති මණ්‌ඩලයේ අනුමැතිය හිමිවී ඇත. වෙළෙඳපොළෙහි සහල් මිල පාලනය කිරීමට හැකි පරිදි එම සහල් ක්‍රමානුකූලව වෙළෙඳපොළට නිකුත් කිරීමට නියමිතය.
කර්මාන්ත හා වාණිජ කටයුතු ඇමැති රිෂාඩ් බදියුදීන් මහතා විසින් මීට අදාළ සංදේශය ඇමැති මණ්‌ඩලයට ඉදිරිපත් කර ඇත.
මේ අතර සමස්ථ ලංකා ගොවිජන සම්මේලනය පසුගියදා ප්‍රකාශ කර තිබුණේ, රට තුළ හාල් හිගයක් නොමැති බවයි. මහා පරිමාණ හාල් මෝල් හිමියන් විසින් හාල් හිගයක් මවා පා කුඩා පරිමාණ මෝල් හිමියන් වට්ටවා පාරිභෝගිකයන් සූරාකෑමේ නිරතව සිටින බවයි.
මීට සහල් ආනයේදී සිදුවූ බරපතල වංචාවක් පිළිබදව අමාත්‍ය රිෂාඩ් බදියුදීන්ට එරෙහිව චෝදනා එල්ලවී තිබේ. සහල් මෙට්‍රික් ටොන් 225,000ක් ඉන්දියාවෙන් ආනයනය කොට සතොස ජාලය හරහා බෙදා නොහැර ඒවා අඩු මිලට පෞද්ගලික වෙළෙඳුන් අතට පත් කිරීම සම්බන්ධයෙන් අල්ලස් හෝ දූෂණ විමර්ෂණ කොමිසමට පැමිණිල්ලක් ඉදිරිපත්ව තිබේ.
මෙම සහල් වෙළෙඳපොළට නිකුත් නොකොට මිනිස් පරිභෝජනයට නුසුදුසු වන තත්ත්වයට පත් වන්නට ඉඩහැර සත්ත්ව ආහාර ලෙස පෞද්ගලික අංශයට අඩු මිලට විකිණීමට කටයුතු කර ඇති බවටද වාර්තා වේ. ඒ අනුව එම සහල් යළි සකසා ඇසුරුම් ගත කොට මෙරට හා විදේශ රටවලට ආනයනය කිරීමටද කටයුතු කර ඇතැයිද මාධ්‍ය වාර්තා කර තිබිණි.