පසුගිය මස 09 වැනි දා ජනාධිපති මන්දිරයට ඇතුළු වී ජනාධිපතිවරයා අසුන්ගන්නා පුටුවේ අසුන්ගෙන ඡායාරූප ලබාගත් තරුණයෙකු දැරණියගල ප්‍රදේශයේදී අත්අඩංගුවට ගෙන තිබේ.
28 හැවිරිදි සැකකරු සමන්පුරගම ප්‍රදේශයේ පදිංචිකරුවෙකු බව පොලිසිය පවසයි.
කොටුව මහේස්ත්‍රාත් අධිකරණයට ඉදිරිපත් කිරීමෙන් පසු ඔහු ලබන 10 වැනි දා දක්වා රක්ෂිත බන්ධනාගාරගත කෙරිණ.
මේ අතර අරලිය ගහ මන්දිරයට ඇතුළු වී අයුතු ජනරාශියක සමාජිකයින් වූ දෙදෙනෙකු ඊයේ ජා-ඇළ ප්‍රදේශයේදී අත්අඩංගුවට ගෙන තිබේ.
35 හා 37 හැවිරිදි සැකකරුවන් අද අධිකරණයට ඉදිරිපත් කිරීමට නියමිතයි.
මේ අතර පසුගිය මස 13 වැනි දා කොළඹ 07 මල් පාරේ පිහිටි අග්‍රාමාත්‍ය කාර්යාලයට බලහත්කාරයෙන් ඇතුළු වී එහි දේපොළවලට හානි කිරීම සම්බන්ධයෙන් හඳුනාගත් ප්‍රධාන ක්‍රියාකාරීන් කිහිපදෙනෙකු අත්අඩංගුවට ගැනීම සඳහා පොලීසිය මහජන සහය පතයි.
ඒ, එම සිද්ධිය සම්බන්ධ සමීප අවේක්ෂණ දර්ශන විමර්ශනයේදී ලබාගත් ඡායාරූප කිහිපයක් ද මාධ්‍යයට නිකුත් කරමිනි.
එම පිරිස සම්බන්ධයෙන් යම් තොරතුරක් වෙතොත් 0718 594 950, 0718 594 901 හා 0718 594 924 යන අංකවලට WHATSAPP හෝ ඇමතුම් මගින් දැනුම් දිය හැකියි.
මීට අමතරව 011 242 21 76 යන දුරකතන අංකයට ද ඒ සම්බන්ධ තොරතුරු දැනුම් දිය හැකි බව පොලිස් මාධ්‍ය ඒකකය නිවේදනයක් නිකුත් කරමින් පවසයි.