කටුගස්තොට නගරයේ පසුගිය දිනවල රුපියල් හාරසියයට අලෙවි වූ අමු මිරිස් කිලෝව ඊයේ (13වැනිදා) රුපියල් දහස – එක්දහස් දෙසීය දක්වා ඉහළ ගොස් තිබේ.
නගරයේ පදික වේදිකා ආශ්‍රිතව සිල්ලර වෙළෙඳාමේ නිරත ව සිටින පුද්ගලයන් එසේ අමුමිරිස් වැඩිමිලට අලෙවි කිරීම පිළිබඳව මැණික්කුඹුර ආර්ථික මධ්‍යස්ථානයේ වෙළෙඳ සංගමයේ සභාපතිවරයාගෙන් කළ විමසීමේ දී ඔහු කියා සිටියේ ඊයේ (13 වැනිදා) ආර්ථික මධ්‍යස්ථානයේ අමු මිරිස් කිලෝවක තොග මිල රුපියල් 680ත් 700ත් අතර පැවැති බවය.
අතරමැදියන් මිල ඉහළ දැමීම මගින් අසරණ පාරිභෝගික ජනතාව තව තවත් පීඩාවට පත්වෙන බව ඒ මහතා කියා සිටී.
-අරුණ –