දුම්රිය එංජින් රියදුරන්ගේ සංගමය සහ දුම්රිය නියාමකවරුන්ගේ සංගමය එක්ව හදිසි දුම්රිය වර්ජනයක් ආරම්භකර තිබේ.
දුම්රිය සාමාන්‍යාධිකාරීවරයෙකු බාහිරින් පත් කිරීම, දුම්රිය මැදිරි අලුතින් නිර්මාණය කිරීමට අවශ්‍ය පහසුකම් සැලසීම, අලුත්වැඩියාවන් දුම්රිය දෙපාර්තමේන්තුව තුළින් සිදුකිරීම, ඉන්දියාවෙන් ආනයනයකර තිබෙන දෝෂ සහිත දුම්රිය මැදිරි ගෙනඒම අත්හිටුවීම ආදී ඉල්ලීම් කිහිපයක් මුල් කරගනිමින් එම වෘත්තීය ක්‍රියාමාර්ගයගෙන තිබේ.
දුම්රිය එන්ජින් රියදුරන්ගේ සංගමයේ ලේකම් ඉන්දික දොඩංගොඩ මහතා පැවසුවේ ඉල්ලීම් ඉටුවන තුරු එම වැඩවර්ජනය ක්‍රියාත්මක කරන බවය.
එළඹෙන සිංහල දෙමළ අලුත් අවුරුද්ද සඳහා ගම්බිම් බලායෑමට සූදානමින් සිටින ජනතාවගේ දුම්රිය ප්‍රවාහන පහසුකම් සැපයීම සම්බන්ධයෙන් බලධාරීන් වගකීම ගතයුතු බවද ඔහු පවසයි.
එම වැඩවර්ජනය සඳහා වෘත්තීය සමිති 21ක් ඉදිරියේදී එක්වීමට සූදානමින් ඇති බවද ඉන්දික දොඩංගොඩ මහතා පැවසීය.