අද (15) දිනයේ දි යළිත් වරක් ඉන්ධන මිල සංශෝධනයක් සිදුවීමට නියමිතව තිබේ.
ඒ අනුව ඉන්ධන මිල අඩුවිය හැකි බව වාර්තාවේ.
සෑම දින 14කට වරක් සඳුදා දිනයේ ඉන්ධන මිල සංශෝධනයට ලක් කෙරේ.
ඒ අනුව මීට පෙර අවසන් වරට ඩීසල් මිල රුපියල් 10කින් පහත දැමීමට රජය පියවර ගත්තේය.
මේ අතර ජාතික ඉන්ධන අවසර පත්‍රය හෙවත් QR ක්‍රමවේදය ඊයේ (14) මධ්‍යම රාත්‍රීයේ සිට යළි යාවත්කාලීන කෙරුණි.
පසුගිය සතියේ දත්ත විශ්ලේෂණය කිරීමෙන් අනතුරුව ඉදිරි සතිය සඳහා ලබා දෙන ඉන්ධන කෝටාවේ සිදුකරන වෙනස්කම් පිළිබඳව ඉදිරියේ දී ප්‍රකාශයට පත්කරන බව විදුලි බල හා බලශක්ති අමාත්‍යංශය සඳහන් කළේය.
මෙම මස පළමු දින සිට QR ක්‍රමවේදයට අනුව ඉන්ධන කෝටාව යටතේ වාහන සඳහා ඉන්ධන නිකුත් කිරීම සිදුකරනු ලබයි.
මේ අතර QR ක්‍රමවේදයෙන් බැහැරව ඉන්ධන නිකුත් කරන පිරවුම්හල් සම්බන්ධයෙන් අවශ්‍ය නීතිමය සහ පරිපාලනමය තීරණ ගන්නා ලෙස විදුලිබල හා බලශක්ති අමාත්‍ය කංචන විජේසේකර මහතා උපදෙස් ලබාදී ඇති බව වාර්තා වේ.