යළිත් කිසිදා ශ්‍රී ලංකාව තුළ යුද්ධයක් ඇති නොවන බවට තමන්ට විශ්වාස යැයි යාපනය භාර යුද හමුදා සේනාකාධිපති මේජර් ජෙනරාල් මහේෂ් සේනාරත්න මහතා පවසයි.
උතුරේ ආරක්ෂක තත්ත්වය පිළිබදව කරුණු පැහැදිළි කිරීම සදහා යාපනය හමුදා මූලස්ථානයේදී පැවති මාධ්‍ය හමුවක් අමතමිනුයි සේනාංකාධිපතිවරයා මේ බව කියා සිටියේ.
යුද්ධයක් නැති නමුත් යුද හමුදාව උතුරේ රැඳී සිටීම නිසා සාමාන්‍ය වැසියන්ට ඉන් විශාල යහපතක් මෙන්ම සේවාවක් ද සිදු වන බවත්, උතුරේ සිද්ධස්ථානවල සිදු වන සෑම කටයුත්තකදී මෙන්ම ආපදා අවස්ථාවලදී යුද හමුදාව සාමාන්‍ය වැසියන් සමග ඉතාම මිතුරුව කටයුතු කරන බවත් මේජර් ජෙනරාල්වරයා අවධාරණය කළේය.
තමන්ට ඇති සියලුම ගැටළු ළගම පිහිටි හමුදා කඳවුර වෙත ඉදිරිපත් කොට සහනයක් ලබාගන්නා ලෙසත්, ඕනෑම දුක්ගැනවිල්ලක් යුද හමුදාව වෙත ඉදිරිපත් කළ හැකි බවත් ජනතාවට දැනුම් දී ඇතැයිද ඔහු එහිදි පැවසීය.
මේ අතර දෙමළ ජාතික සන්ධානයේ දේශපාලනඥයින් කියා සිටින්නේ යුද්ධය අවසන් වී වසර හතක් ගත වී ඇති බැවින් යුද හමුදාව උතුරු පළාතෙන් ඉවත් විය යුතු බවයි. උතුරු පළාත් ප්‍රධාන අමාත්‍ය සීවී විග්නේස්වරන් වවුනියාවේදී මෙන්ම උතුරේ ස්ථාන කීපයකදීම පවසා ඇත්තේ යුද හමුදාව උතුරෙන් ඉවත් කොට ඒ වෙනුවට පොලිස් බල ඇණි යොදා උතුරේ වැසියන්ට ආරක්ෂාව සපයා දිය යුතු බවයි.