පසුගිය දෙවැනිදා රුසියානු එරොෆ්ලොට් ගුවන් යානයට මෙරටින් පිටවීම තහනම් කරමින් නිකුත් කළ වාරණ නියෝගය අත්හිටුවීමට කොළඹ වාණිජ මහාධිකරණය අද(6)දින නියම කළේය.
වාණිජ මහාධිකරණ විනිසුරු හර්ෂ සේතුංග මහතා විසින් අද එම නියෝගය ලබා දී තිබේ.
ඒ, මෙම වාරණය ඉවත් කරන ලෙස නීතිපතිවරයා අද අධිකරණයෙන් කළ ඉල්ලීමක් අනුවයි.
මගීන්ට සිදුවූ අපහසුතාවත්, ජාතික ආර්ථිකයට ඇතිවූ හානියත්, අදාළ අධිකරණ තීන්දුව පිළිබඳව ඇති නීතිමය පසුබිමත් සම්බන්ධයෙන් පවතින ගැටළුකාරී තත්වය පිළිබඳ අවධානය යොමුකරමින් මෙම මෝසම ගොණු කරන බව එහි දක්වා ඇත.
උද්ගත වූ තත්වය හමුවේ රුසියාවේ සිට ශ්‍රී ලංකාව දක්වා වාණිජ ගුවන් ගමන් තාවකාලිකව අත්හිටුවීමට ද එරෝෆ්ලොට් ගුවන් සමාගම මේ වනවිට පියවර ගෙන තිබේ.