ව්‍යාජ විදේශ ගමන් බලපත්‍රයක් යොදා ගනිමින් ජර්මනියට යෑමට සූදානම්ව සිටියදී පසුගිය (01) දා ඉන්දීය පොලීසිය මගින් අත්අඩංගුවට ගත් ප්‍රධාන පෙලේ එල්.ටී.ටී.ඊ නායකයෙකු මෙරටට පිටුවහල් කිරීමට ඉන්දීය රජය තීරණය කර තිබෙන බව එරට මාධ්‍ය වාර්තා කරයි.
අත්අඩංගුවට ගත් මෙම හිටපු එල්.ටී.ටී.ඊ. සාමාජිකයා සම්බන්ධයෙන් පූනේ පොලීසිය පරීක්ෂණ සිදුකළ අතර එහිදී මොහු ඉන්දියාවේ සිදුවූ අපරාධ රැසකට සම්බන්ධ බවට තොරතුරු අනාවරණය වී ඇත. සැකකරු සුදන් සුප්පයියා ලෙසට හඳුනාගෙන ඇති අතර ඔහු මාරිමුත්තු යන නාමයෙන් 2005 වර්ෂය දක්වා එල්.ටී.ටී.ඊ. සංවිධානයේ ක්‍රියාකාරී සාමාජිකයෙකු ලෙස කටයුතු කර ඇත.
මොහු ශ්‍රී ලංකාවට පිටුවහල් කිරීම සඳහා තාවකාලික වීසා බලපත්‍රයක් ලබා දෙන ලෙස ශ්‍රී ලංකා තානාපති කාර්යාලයට පූනේ පොලීසිය මගින් ඉල්ලීමක් ද කර තිබේ. ඒ අනුව සැකකරු ලබන සතියේදී මෙරටට පිටුවහල් කිරීමට නියමිත බව ඉන්දීය මාධ්‍ය වාර්තා පවසයි.