සංචාරක අමාත්‍ය ජෝන් අමරතුංග මහතාගේ අනුදැනුම ඇතිව කඩා දැමුවේ යැයි චෝදනා එල්ල වන වත්තල මාබෝල, කළු ඇල ඇවිදින මංතීරුව නැවත තිබූ අයුරින් සැකසීම ඊයේ 5 දා සිට ආරම්භ කර ඇත.
නාගරික සංවර්ධන අධිකාරිය විසින් මෙහි ඉදිකිරීම් කොන්ත්‍රාත්තුව පෞද්ගලික සමාගමකට ලබා දී ඇති අතර ඒ සදහා රුපියල් මිලියන 80ක මුදලක් වැයවන බවද වාර්තා වේ.
මෙම ඇවිදින මංතීරුව කඩා දැමීමට එරෙහිව මහජනතාවගෙන් එල්ලවූ දැඩි විරෝධය හේතුවෙන් මෙම මංතීරුව නැවත ඉදිකිරීමට කටයුතු කර ඇති අතර මෙය කඩා දැමීම පිටුපස අදාළ ඇමතිවරයා සම්බන්ධවූ අතයට ගණුදෙණුවක් ඇති බවද ප්‍රදේශවාසීන් චෝදනා කරයි.
විශාල මුදලක් වැය කරමින් මහජනතාවගේ ශරීර සුවතාව වෙනුවෙන් ඉදිකර තිබූ මෙම මං තීරුව කඩා ඉවත් කිරීමෙන් විනාශ වූ මහජන මුදල් මෙන්ම එය නැවත ඉදිකිරීමට වැයවන මුදල්වලට වගකිවයුත්තේ කවුරුන්දැයි මහජනතාව ප්‍රශ්න කර සිටිති.