බත්තරමුල්ල හා ඒ අවට මාර්ගවල මේ වන විට රථ වාහන තද බදයක් හටගෙන තිබේ.
ඒ, ආගමන හා විගමන දෙපාර්තමේන්තුවේ ප්‍රධාන කාර්යාලයට පැමිණි පිරිසක් ඒ අසල විරෝධතාවක නිරතවීම හේතුවෙනි.
ආගමන හා විගමන දෙපාර්තමේන්තුවේ ප්‍රධාන කාර්යාලය ඇතුළු සියලුම ශාඛා කාර්යාලවල එක් දින හා සාමාන්‍ය සේවා ගමන් බලපත්‍ර අයදුම්පත් භාර ගැනීමේ කටයුතු අද සිදු නොකරන බව දැනුම් දීමත් සමග ජනතාව එලෙස විරෝධතාවයේ නිරත විය.
ආගමන හා විගමන දෙපාර්තමේන්තුව එම කටයුතු අත්හිටුවා ඇත්තේ, හදිසි පරිගණක පද්ධති නඩත්තු කටයුත්තක් බව පවසමිනි.
මේ හේතුවෙන් අනෙකුත් සේවා කටයුතු ද දහවල් 12.30 දක්වා සීමා වනු ඇති.
මේ අතර පොල්දූව වටරවුමේ සිට පාර්ලිමේන්තුව දෙසට ඇති මාර්ගය අදත් වසා දමා තිබේ.