අග‍්‍රාමාත්‍ය ධුරයෙන් ඉවත් නොවී විශ්වාසභංග යෝජනාවට මුහුණදීමට අග‍්‍රාමාත්‍ය රනිල් වික‍්‍රමසිංහ මහතා තීරණය කර තිබෙනවා. ආණ්ඩුව නියෝජනය කරන ඇතමුන් විශ්වාසභංගයට පෙර අග‍්‍රාමාත්‍ය ධුරයෙන් ඉල්ලා අස්වන ලෙස රනිල් වික‍්‍රමසිංහ මහතාගෙන් ඉල්ලීම් කර තිබෙනවා. එහෙත් අග‍්‍රාමාත්‍යවරයාගේ ස්ථාවරය වී ඇත්තේ තමන් ඉල්ලා අස්වීමට හේතුවක් නොවන බවයි.
තමන් ඡන්දයකින් ජයගෙන අග‍්‍රාමාත්‍ය ධුරයට පත්ව ඇති බවත් එලෙස ඉල්ලා අස්වන්නේ නම් සෙසු අමාත්‍යවරුන් මෙන්ම ජනාධිපතිවරයාද ඉල්ලා අස්විය යුතු බවයි අග‍්‍රාමාත්‍යවරයාගේ ස්ථාවරය වී ඇත්තේ. කුමන අදහස් පළ වුවද විශ්වාසභංගයට මුහුණදී එය ජය ගැනීම අග‍්‍රාමාත්‍ය රනිල් වික‍්‍රමසිංහ මහතාගේ අදහස වී ඇති බවයි දේශපාලන ආරංචිමාර්ග අනාවරණ කළේ.
ශී‍්‍ර ලංකා නිදහස් පක්‍ෂය ඊයේ පැවැත් වූ මාධ්‍ය හමුවකදීද ඊට එක් වූ අමාත්‍යවරුන් කිහිප දෙනෙකු ප‍්‍රකාශ කළේ විශ්වාසභංග යෝජනාව විවාදයට ගැනීමට පෙර අග‍්‍රාමාත්‍යවරයා ඉවත් වියයුතු බවයි.