දිවයිනේ සෑම පොලිස් ස්ථානයකටම අනියුක්ත කර තිබු රාජ්‍ය බුද්ධි අංශ ඒකක වහාම ක්‍රියාත්මක කරන ලෙස අග්‍රාමාත්‍ය රනිල් වික්‍රමසිංහ මහතා පොලිස්පතිවරයාට නියෝග කර තිබේ.
පාතාලයට මෙන්ම විවිධ ජාවාරම් සම්බන්ධයෙන් ආරක්ෂක අංශවලට තොරතුරු ලබා දීමට බුද්ධි අංශ ස්ථාපිත කර තිබූ බවත්, පසුගිය පාලන සමයේ දී ඒවා අහෝසි කර ත්‍රස්ත විමර්ශන ඒකක සහ ත්‍රිවිධ හමුදා බුද්ධි අංශවලට එම කාර්යය භාරය පවරා තිබූ බවත් පැවසේ.
තව ද පොලිස් බල ප්‍රදේශවල සිදු වන මිනීමැරීම්, කොල්ලකෑම් වැනි දරුණු ගණයේ අපරාධ සම්බන්ධයෙන් එම ප්‍රදේශය භාර නියෝජ්‍ය පොලිස්පති, ජ්‍යෙෂ්ඨ පොලිස් අධිකාරිවරුන්, පොලිස් අධිකාරිවරුන් සහ සහකාර පොලිස් අධිකාරිවරුන් වගකීම භාර ගත යුතු බව අග්‍රාමාත්‍ය වික්‍රමසිංහ මහතා නීතිය සහ සාමය අමාත්‍යාංශයට දැනුම් දී ඇත.
ඊට අමතරව පළාතේ සිදු වන එවැනි අපරාධ සම්බන්ධයෙන් අදාළ පොලිස් ස්ථානය භාර ස්ථානාධිපතිවරයා ද වගකීම දැරිය යුතු බව ද දැනුම් දී ඇති අතර පසුගිය දිනවල සිදු වු පාතාල සිද්ධීන් ඇතුළු අපරාධ සම්බන්ධයෙන් වගකීම භාර ගැනීමක් සිදු නොවීම නිසා මේ නියෝගය සිදු කර තිබෙන බව සඳහන් වේ.